‘सुरमा भोपाली’ नांजाम्ह हास्य कलाकार जगदीप मन्त
लहनान्युज | दिल्लागा चौथी ११४०,असार २५ बिहीवाः
सुरमा भोपाली नामं नाजाम्ह बलिउडया वरिष्ठ हास्य कलाकार जगदीप मन्त ।
क्यान्सर ल्वयया पीडितम्ह जगदीप ८१ दँय बुधवाः चान्ह्य मुम्बई थःगु छेँय् हे मदुगु खः । थौं बिहीवाः अन्त्येष्टि याइगु जुगु दु ।
जगदीपया वास्तविक नां सैयद इश्तियाक अहमद जाफरी खः । वया काय् पि कलाकारद्वय जावेद व नावेद जाफरी खः ।
मदुम्ह जगदीपं प्यसः स्वया अप्व फिल्मय् म्हितिगु दु । सन् २०१२ या ‘गली गली चोर’ वयागु दकलय् लिपागु फिल्म खः ।
सन् १९७५ य् दय्कूगु शोले फिल्मय् वं सुरमा भोपालीया भूमिकाय् बलिउडय् तसक बय् बय् जूगु खः । वया लिपा सन् १९८८ य् ‘सुरमा भोपाली’ नाम हे फिल्म दयेकुगु खः, उकिइ जगदीपया मू भूमिका दुगु खः ।
जगदीपं सुरु बाल कलाकारया रुपय् मास्टर मुन्नाया रुपय् बीआर चोपडाया फिल्मय् ‘अफसाना’ म्हितिगु खः । वया लिपा ‘लैला मजनु’ य् न बाल कलाकारया रुपय् म्हितिगु खः ।
