‘ह्यूपाः’ बाखं सफूया समीक्षा ज्याझ्वः
लहनान्युज | चौलाथ्व षष्ठी ११३८ (मार्च २३ २०१८)
‘ह्यूपाः’ बाखं सफूयात कयाः यलया प्रतिभा समाजया हलय् थौं शुक्रवाः समीक्षा ज्याझ्वः जूगु दु ।
‘‘भवानी तुलाधरया ‘ह्यूपाः’ नारी समस्या प्रधान बाखंमुना’’ छ्यं छुसे समीक्षा यानादीगु खः । झीगु समाजय् ब्वलनाच्वंगु सामाजिक कुरिति, पारिवारिक रितिरिवाज, झीत वयाच्वंगु अव्यवस्थित परिस्थिति आदिया किपा न्ह्यब्वयेगु कुतःयानातःगु खँ समीक्षक पूर्णकाजी ताम्राकारं न्ह्यब्वयादिल ।
थुगु ‘ह्यूपाः’ बाखं मुनाय् समाजय् जुयाच्वंगु महिला हिंसा न्हंकेत व लैङ्गिक समानताया नितिं नारीवर्ग सवल व सचेत जयाः न्ह्यज्यायेत, न्ह्यज्यांवनेत प्रेरित यानातःगु कथाबस्तुइ केन्द्रीत जूगुलिं सफूया नां ‘ह्यूपाः’ पाय्छि जूगु कनादिल ।
नेपालभाषा परिषद्या ग्वसालय्, प्रा. सुर्वण शाक्यया नायःसुइ, नविन चित्रकारं ज्याझ्व न्ह्याकादीगु खः । नुगः खँ तयेगु झ्वलय् मुँज्या नायः शाक्यं ‘ह्यूपाः’ बाखं मुना सफुतिं झीगु समाजय् पिल्हुयाच्वंगु विकृति, विसंगती, कुरिति, महिला हिंसा आदि घटनायात कयाः न्हाय्कं थें यथार्थ चित्रण यानाब्यूगु खँ कनादिल ।
ज्याझ्लय् श्रीराम श्रेष्ठ, बंशीधर बज्राचार्य, दिब्या ताम्राकार, महेश मान डंगोल ‘लँजुवाः’ सफुतिइ दुथ्याःगु बाखं व समीक्षायात कयाः थःथःगु प्रतिकृया नापं न्ह्यसः नं तयादीगु खःसा च्वमि मय्जु तुलाधरं लिसः नं बियादीगु खः ।
बुखँ नेवाः सूचना केन्द्र
किपा राजेन्द्र रञ्जित
