“आइपीएल”य् सन्दीपयाब्वज्या
– प्रजित शाक्य
नेपाःया कासा क्षेत्रय् थौंकन्हय् क्रिकेट कासामि सन्दीप लामिछानेया चर्चा छचाखेरं जुयाच्वंगु दु । ईण्डियन प्रिमियर लिगय् सन्दीपं याःगु ब्वज्यां नेपालय् जक मखु, विश्व क्रिकेटय् हे म्हसीकेगु ज्या जुल ।
थ्यंमथ्यं निलातक न्ह्याःगु आइपीएलय् विश्वया उत्कृष्ट क्रिकेट कासामित नापलाइगु खः । उकिं नं सन्दीपं थजाःगु दबुली थःगु क्षमता न्ह्यब्वयाः थःत स्टार सावित यानाब्यूगु दु । सन्दीपं आइपीएलय् मुक्कं स्वंगू कासा जक म्हितूगु खः । प्रत्येक कासा म्हितीगु इलय् सन्दीपलिसे नेपाःया नां नं स्वानावइगु खः । उकिं सन्दीपं आइपीएलया माध्यमं नेपाःया नां हलिमय् न्यंकाब्यूगु दु धाःसां पाइमखु ।
मुक्कं स्वंगू कासा म्हितूगु सन्दीप अनुमान याःथें बेञ्चय् हे च्वनेमाःगु खः, शुरुया झिंछगू कासाय् । सन्दीप मदुगु दिल्लीया प्रदर्शन धाःसा बांलाः मजुल । अझ करोडौं धेबा पुलाः हःपिं कासामिपिन्सं थःगु नांकथं ब्वज्या याय्मफूगु खः ।
उकिं दिल्ली प्लेअफय् थ्यनीगु सम्भावना सन्दीप मम्हितूगु इलय् हे थ्यंमथ्यं क्वचाय्धुंकूगु खः । थजाःगु स्थितिइ सन्दीपयात दिल्लीं म्हितकाः न्हूगु प्रयोग याःगु खः । सन्दीपं थःत वःगु ह्वःताःयात सितिं मछ्वल । धात्थें आइपीएलय् सन्दीपया ब्वज्या गथे जुल ले ?
सन्दीप भर्सेज रोयल च्यालेन्जर्स बेंगलोर
रोयल च्यालेन्जर्स बेंगलोरविरुद्ध दिल्ली डेयरडेभिल्सया जर्सीइ सन्दीप लामिछाने कासाख्यलय् कुहां वय्धुंकाः नेपाःया क्रिकेट समर्थकपिनिगु थः कासामियात इण्डियन प्रिमियर लिगय् ‘म्हितूगु’ स्वय्गु इच्छा पूवंगु खः । लेग स्पीनर सन्दीप बेंगलोर विरुद्ध कासा म्हिताः आइपीएलय् म्हितूम्ह न्हापांम्ह नेपाःया क्रिकेट कासामि जुयादीगु जक मखु, वय्कलं विश्वया हे दकलय् तःधंगु व बलरया नितिं थाकूगु टि–ट्वान्टी कासाय् थःगु न्हापांगु कासायात लुमंकेबहःकथं दय्काबिल ।
खय्त ला बेंगलोर विरुद्धया कासाय् सन्दीपया टिम दिल्ली न्यागू विकेटं बूगु खः । तर दिल्ली बूगु कासाय् नं सन्दीप धाःसा चर्चाय् वल । विश्वया निम्ह उत्कृष्ट ब्याट्स्म्यान विराट कोहली व एबी डिभिलियर्सं विस्फोटक ब्याटिङ्ग यानाः बेंगलारया नितिं कासा त्याकेबिल । कोहलीं ४०गू बलय् ७०गू रन व डिभिलियर्सं ७गू बलय् अविजित ७२गू पालि म्हितूगु खः । अथेखःसां थुपिं निम्हं बांलाःगु फर्मय् म्हिताच्वंगु इलय् नं सन्दीप विरुद्ध खुले जुयाः रन दय्के मफुत ।
सन्दीपं कय्कूगु २४गू मध्ये १०गू ‘डट’ बल खः । सन्दीपं प्यंगू ओभरय् २५गू रन बियाः छगू विकेट काःगु खः । दिल्लीया कप्तान श्रेयर एयरं सन्दीपयात न्हापांगु ओभरय् हे बलिङ्ग याकेब्यूगु खः । वय्कः स्वयां अनुभवी भारतीय टिमया नितिं आपालं विकेट काय्धुंकूम्ह मेम्ह लेग स्पीनर अमीत मिश्रा विकल्पकथं दुगु खः । तर कप्तान श्रेयसं जोखिम नालाकाल । सन्दीपं नं कप्तानया विश्वासयात क्वतुंके मबिल ।
सन्दीपया नितिं थ्व कासा छगू तःधंगु ह्वःताः नं खः । थुगु कासाय् थःगु ‘छाप’ त्वःतेफूसा थःगु जक मखु, नेपाःया हे नां बय्बय् जइगु खः । अथेखःसां शुरुइ बलिङ्ग याय्गु ज्या धाःसा अःपूगु मखु । छखे सन्दीप न्हापांखुसी आइपीएल थेंजाःगु विश्वया हे मिखाय् लानाच्वंगु कासाय् प्रत्यक्षकथं स्वीद्वः स्वयां अप्वः स्वकुमिपिनिगु न्ह्यःने म्हिताच्वंगु खः ।
मेखे ‘पावर प्ले’स स्पीनरयात बलिङ्ग याय्गु थाकूगु ज्या खः । पालिया न्हापांगु खुगू ओभरय् स्वीगू गज स्वयां पिनेजक निम्ह फिल्डर तय्फइ । अथे हे बेंगलोरया प्रारम्भिक निम्ह ब्याट्स्म्यानत पार्थिव पटेल व मोइन अलीया छवि बिस्फोटक ब्याट्स्म्यानकथं दयाच्वंगु खः ।
तर पार्थिव व अली थेंजाःपिं अनुभवी विश्वस्तरीया ब्याट्सम्यान सन्दीपया बलिङ्ग क्वातूगु खः । वय्कलं थःगु निगू ओभरया प्यंगूगु बलय् पार्थिव पटेलयात एलबीडब्ल्यूया धरापय् लाकल । लेग स्पीन बल हल्का चाःहिलेवं सन्दीपया जालय् पार्थिव लाःगु खः । थुगु सत्रय् लयस दुम्ह पार्थिव खुगू रनय् हे पिहां वनेवं दिल्लीया सुरुवात बांलाःगु खः । उगु कासाय् दिल्लीया न्याम्ह बलरत मध्ये सन्दीप दकलय् किफायती बलर सावित जूगु खः ।
सन्दीप भर्सेज चेन्नई सुपर किङ्स्
इण्डियन प्रिमियर लिग (आइपीएल)य् नेपाःया लेग स्पीनर सन्दीप लामिछानें लगातार निगूगु कासाय् थःगु ‘छाप’ त्वःतेत ताःलात । सन्दीपया हे महत्वपूर्ण योगदानय् दिल्ली डेयरडेभिल्सं चेन्नई सुपर किङ्गस्यात ३४गू रनं बुकेत ताःलाःगु खः । चेन्नइयात पनेगु नितिं दिल्लीया निम्ह लेग स्पीनर सन्दीप लामिछाने व अमीत मिश्रया योगदान महत्वपूर्ण जुल ।
सन्दीप बूगु दँय् मिश्रां न्हापांगु श्रेणीया क्रिकेटय् पलाः तःगु खः । अथेखःसां सन्दीप लेग स्पीन बलिङ्गय् मिश्रायागु हे स्तरय् बलिङ्ग खनेदत । सन्दीपं चेन्नईया महेन्द्र सिंह धोनी, सुरेश रैना, शेन वाट्सन, अम्बाटी रायडु थेंजाःपिं कासामितय्त रन दय्केत संघर्ष याकाः लिपांगु कासाय् रोयल च्यालेन्जर्स विरुद्धया थःगु ब्वज्या ‘टुक्का’ मजूगु साबित याना क्यन ।
सन्दीपं प्यंगू ओभरय् मुक्कं २१गू रन बियाः आइपीएलया हस्ति कासामि सुरेश रैनायात आउट याःगु खः । सन्दीपया ‘गुगली बल’यात थुइके मफूगु इलय् रैना डिपमिड विकेटय् क्याच आउट जुल । उगु विकेटलिपा चेन्नईया पालि धरमर जूगु खः । सन्दीपयात किफायती बलिङ्ग याःगु धासें ‘स्टाइलिस प्लेयर अफ दि अवार्ड’ नं बिल । गुकी वय्कलं छगू लखतका भारतीय दां सिरपाःकथं प्राप्त याःगु खः ।
सन्दीप भर्सेज मुम्बईइण्डियन्स्
दिल्लीं थःगु दकलय् लिपांगु कासाय् प्लेअफय् वनीगु लँपुइ लानाच्वंगु मुम्बई इण्डियन्स्यात निराश यात । गुकिया श्रेय नं सन्दीपयात हे वनी । सन्दीपं स्वंगू विकेट काय्धुंकाः इण्डियन प्रिमियर लिग (आइपीएल)य् दिल्ली डेयर डेभिल्सं मुम्बइ इण्डियन्सयात ११गू रनं बुकल ।
सन्दीपं थःत ‘विकेट टेकर’ बलर सावित याय्गु झ्वलय् मुम्बई विरुद्ध प्यंगू ओभरय् ३६गू रन बियाः स्वंगू विकेट काःगु खः । वय्कलं सूर्यकुमार यादव, किरण पोलार्ड व क्रुणाल पाण्डेयात पवेलियन लित छ्वःगु खः । थुपिं स्वम्हं ब्याट्स्म्यान मुम्बईयात कासा त्याके बीफूपिं कासामित खः । आइपीएलय् थ्व हे सन्दीपया दकलय् बांलाःगु बलिङ्ग ब्वज्या नं खः ।
मुम्बई इण्डियन्स् विरुद्ध सन्दीपं हे आक्रमणया सुरुवात याःगु खः । वय्कलं थ्व पाली न्हापांगु ओभरय् हे सफलता प्राप्त याःगु खः । सूर्यकुमारं न्हापांगु बलय् चौका व निगूगु बलय् चौका थ्वानाः सन्दीपयात दबाबय् लाकेगु आशय क्यंगु खः । सूर्यकुमारं न्हापांगु स्वंगू बलय् झिंनिगू रन काय्त ताःलाःगु खः । अथेखःसां सन्दीपया आत्मविश्वास कुहां मवं । वय्कलं प्यंगूगु बलय् हे विकेट कयाः सूर्यकुमारया पालि क्षणिक जक यानाबिल ।
सन्दीप झिगूगु ओभरय् बलिङ्गया नितिं लिहांवल । गुगु सन्दीपया नितिं बलिङ्ग याय्त तुलनात्मककथं अःपूगु ई खः । उगु इलय् मुम्बईया स्थिति स्वंगू विकेटया क्षतिइ ७४गू रन जक खःसा लिपांगु बलय् अमीत मिश्रां विस्फोटक ब्याटिङ्ग यानाच्वंम्ह लुइसया विकेट काःगु खः । गुकिया फाइदा कासें सन्दीपं थःगु निगूगु ओभरय् किरोन पोलार्ड व क्रुणाल पाण्डेयात आउट यानाः मुम्बईया पालियात कमजोर यानाब्यूगु खः ।
