“लहना”या यात्रा
नृपेन्द्रलाल श्रेष्ठ
नेपालभाषाया रंगीन वाःपौकथं वि.सं. २०७० साल फागुण २७ गते मंगलवाः पिहांवःगु खः ‘लहना’ । निरन्तर संघर्ष व हाथ्याःयात चीकाः पत्रिका पिहांवःगु नं थनिं प्यदँ फुनाः न्यादँय् क्यन ।
मातृभाषा पत्रिकाय् स्थानीय सरकार व नेपाल सरकारं विज्ञापनय् आरक्षण बीगु मयाःगुलिं अप्वः पत्रिकायात निरन्तरता बीगु ज्याय् थाकुयाच्वंगु दु ।
नेपालभाषा पत्रकारिता ख्यलय् आपालं न्हिपौ, वाःपौ, लय्पौ, दँपौ, बाःछिपौ आदि यक्व हे पिहांवःगु खनेदुसां थुकियात निरन्तरता बी मफयाः आपालं पत्रिकात दिनावंगु खनेदु । थौंकन्हय् स्वय्गु खःसा नेपालभाषा ख्यलय् ज्वजलपा, अप्सार, तिकिझ्याः व लहना यानाः प्यंगू वाःपौ पिदनाच्वंगु खनेदु ।
थौंकन्हय् छापा पत्रकारिताय् जक डिजिटलय् पलाः न्ह्याय्धुंकूगु दु । थ्व हे झ्वलय् थौंकन्हय् नेवाःअनलाइनन्यूज डट कम, झीगु डट कम, नेपालभाषा टाइम्स डट कम, लहनान्यूज डट कम आदि अनलाइन मार्फत हलिंन्यंक आपालं नेवाः बुखँत थ्यनाच्वंगु दु । थ्व छगू सकारात्मक खँ खः । अथेखःसां नं थुकियात निरन्तरकथं न्ह्याकेगु धइगु नं छगू हाथ्याः जुयाच्वंगु दु ।
दथुइ दथुइ आपालं डिजिटल पत्रिका दिना वनाच्वंगु थुकिया उदाहरणकथं काय्फु । थ्व हे झ्वलय् थन न्ह्यथनेमाःगु खँ छु धाःसा स्थानीय सरकारपाखें विशेषयानाः महानगरपालिकापाखें नेपालभाषाया पत्रकारिता ख्यःयात अझ धिसिलाक्क न्ह्याका यंकेगु नितिं मातृभासं जनमानसय् सूचं थ्यंकेगु नितिं महानगरया सूचं व विज्ञापन बियाः निरन्तरता बीगु ज्यायात न्ह्याका यंकेमाः ।
लहनापाखें पत्रकारिता विकासया नितिं थीथी सिरपाः नं लःल्हाना वयाच्वंगु दु । विशेष यानाः पत्रकारिता ख्यलय् योगदान बिया वयाच्वनादीपिं नेवाः पत्रकारपिन्त सम्मान यासें थुगु ज्यायात अझ न्ह्यःने यंकेगु नितिं हःपाः बीकथं थुकथंया ज्याझ्वःया सुरुवाट याःगु खः, लहनां ।
थ्व हे झ्वलय् समाजसेवी लक्ष्मण गमालं थः मांअबुया नामय् नीस्वंगु सिरपाः “लहना–धर्म–मोति सिरपाः” खः । थुगु सिरपाः दकलय् न्हापां सन्ध्या टाइम्स न्हिपौया सम्पादक नापं वरिष्ठ पत्रकार सुरेशकिरण मानन्धरयात लःल्हाःगु खःसा वयां लिपा नेपालमण्डल टेलिभिजन नापं येँ महानगरपालिकापाखें न्ह्याका वयाच्व.गु मेट्रो एफ.एम.या श्रीकृष्ण महर्जनयात थुगु सिरपाः लःल्हाःगु जुल । अले लिपांखुसी राष्ट्रिय समाचार समितिया सम्पादक राजु शाक्ययात थुगु सिरपाः लःल्हाःगु खः ।
अथे हे समाजसेवी सुरबहादुर श्रेष्ठं नीस्वनादीगु “लहना–सुर सम्मान” कलाकार सुरेन्द्र तुलाधार व वरिष्ठ सिनेपत्रकार विजयरत्न तुलाधर असंबरेयात लःल्हाःगु दु । विशेष यानाः नेपालभाषाया कला क्षेत्रय् योगदान बिया वयाच्वनादीन्त थुगु सिरपाः लःल्हाय्गु ज्या जूगु खः । लहनां पत्रकारिता ख्यलय् जक मखु, पत्रकारिता मार्फत सिने क्षेत्रय् व कलाकारपिन्त सम्मान याय्गु ज्यां निश्चित रुपं कला क्षेत्रय् नं योगदान बीगु ज्याया शुरुवात याःगु दु ।
थुलि जक मखु, नेपालभाषालिसें पत्रकारिता ख्यलय् ज्वःमदुगु योगदान बियादीम्ह हनेबहःम्ह प्रा. माणिकलाल श्रेष्ठयात “लहना–पञ्चवीर सिरपाः” व “लहना–मोहिनी सिरपाः” पत्रकार सुनील महर्जनयात लःल्हाय्धुंकूगु दु । थ्व हे झ्वलय् थुगुसीनिसें न्यू जेनिथ मोडेल स्कूलया प्रिन्सिपल राजु महर्जनं बीगु नितिं थगुने लहनाया वार्षिकोत्सवया झ्वलय् घोषणा यानादीगु खः । लहनाया नितिं थ्व छगू न्ह्यथनेबहःगु खँ जुल ।
थ्व हे झ्वलय् लहनापाखें श्रष्टायात सम्मान याय्गु तातुनां ‘लहना मिडिया’ पलिस्था याःगु जुल । थःगु आज्जु कथं लहना मिडियां दकलय् न्हापां जगतसुन्दर ब्वनेकुथिनाप जानाः उगु हे ब्वनेकुथिया ब्वँमिपिन्सं जनकवि दुर्गालाल श्रेष्ठया च्वसां पिदंगु थीथी म्येय् हुलाप्याखं न्ह्यब्वय्गु ज्या जूगु खः, यलया अशोक पार्टी प्यालेसय् । थुगु ज्याझ्वलय् नेपाःया लोकंह्वाःपिं कलाकारपिं भृगुराम श्रेष्ठ, आनी छोइङ्ग डोल्मा, न्ह्यू बज्राचार्य, संगीता शाक्य, निशा देशार, सानुबाबु महर्जनलिसें आपालं कलाकारपिन्सं थःगु प्रस्तुति न्ह्यब्वयादीगु खःसा लोककवि राजभाइ जकःमिं दुर्गालालया बारे चिनाखँ न्ह्यब्वयादीगु खः । ज्याझ्वलय् जगतसुन्दर ब्वनेकुथि व लहना मिडियापाखें जनकवि दुर्गालाल श्रेष्ठयात तःजिक हनेगु ज्या नं जूगु खः ।
अथे हे मेम्ह श्रष्टा नेपाःया नांजाःम्ह म्येहालामि ‘गोल्डेन भ्वाइस अफ नेपाल’कथं म्हस्यूम्ह प्रेमध्वज प्रधानयात नं हनेगु ज्या लहना मिडियापाखें जूगु दु । विनायक मल्टी भेन्यूस जूगु उगु ज्याझ्वलय् ख्वताबजिपाखें नं थःगु प्रस्तुति न्ह्यब्वय्गु ज्या जूगु खःसा स्रष्टा प्रधानयात न्यय्छद्वः तका दां नं सम्मानकथं लःल्हाय्गु ज्या जूगु खः । थुकथं लहना मिडियापाखें पत्रकार व स्रष्टापिन्त हनेगु ज्या याना वयाचवंगु दु ।
लहना आः प्यदँ फुनाः न्यादँय् पलाः तःगु दु । आःतक नं धिसिलाक्क पलाः न्ह्याकेफूगु अवस्था मदुनि । तर थौंया इलय् तक थ्यंकेत लहना वाःपौया नितिं च्वसु बियादीपिं, विज्ञापन बियादीपिं, नियमितकथं प्रत्यक्ष अप्रत्यक्ष ग्वाहालि यानादीपिं सकलपाखें यक्व यक्व कृतज्ञ जुयाच्वना । आशा दु, थुगु ज्याय् सकलसिनं तिबः बियाः पलाः थातं न्ह्याकेगु नितिं ग्वहालि दयाच्वनी । सुभाय् ।
