“ल्हाचिं लितमकाल धाःसा पार्टी एकता जुइमखु” : प्रधानमन्त्री ओली
लहानान्युज | बछलागा अष्टमी ११४१, असार १८ शुक्रवाः
नेकपा एमालेया नायः एवं प्रधानमन्त्री केपी शर्मा ओलीं नेपाली कांग्रेसया सभापति शेरबहादुर देउवायात प्रधानमन्त्री दयेकेत बिउगु ल्हाचिं लितकायेत नेपाल पक्षपिन्त निन्हूया अल्टिमेटम बिउगु दु ।
बालुवाटारया न्ह्याःगु पार्टीया केन्द्रीय कमिटी मुँज्यां वय्कयात निन्हूया ईलय् ल्हाचिं लितकायेत निर्देशन बिउगु खः ।
एमालेया माधव नेपाल पक्षया २३म्ह सांसदं देउवयात प्रधानमन्त्री दयेकेत ल्हाचिं तःगु खः । व लिपाः ओलीं विघटन याःगु संसद पुनस्र्थापनाया नितिं नं ल्हाचिं तःगु खः ।
नेपाल पक्षं ल्हाचिं लित मकाल धाःसा पार्टी एकता मजुइगु ओलीया धापू खः । एकतायात लिकुंकेत थःम्हेसिनं सतागु मुँज्याय् बामदेव गौतम झाःगु धासें वय्कया प्रशंसा यानादिल ।
शनिबार च्वनिगु केन्द्रीय कमिटीया मुँज्याय् सहभागी जुइत वरिष्ठ नेता माधवकुमार नेपाल पुचःयात वय्कलं आह्वान यानादिल ।
