१०क्वःगु नेफ्टा अवार्डय् “छक्का पञ्जा ३” व “प्रसाद” यात ६÷६गू विधाय् अवार्ड
चिल्लाथ्व पारु, ११४१ चैत १, आइतबाः
चलचित्र प्राविधिक संघं ग्वसाग्वःगु १०क्वःगु नेफ्टा अवार्डय् “छक्का पञ्जा ३” व “प्रसाद” दकले आःपा ६÷६गू विधाय् अवार्ड त्याकूगु दु ।
शनिबार येँया छगु होटल सोल्टी क्राउन प्लाजाय् ६घौ सिबें अप्वः जूगु अवार्ड ज्याझ्वलय् “छक्का पञ्जा ३” थःगु बर्चश्व कायम याःगु खः । उगु संकिपानं उत्कष्ट चलचित्र, उत्कृष्ट निर्देशक, उत्कृष्ट कथा, उत्कृष्ट पटकथा, उत्कृष्ट हाँस्य कलाकारलिसें मू विधाय् अवार्ड त्याकूगु खः ।
उपराष्ट्रपति नन्दबहादुर पुनया मू पाहाँसुई क्वचाःगु अगाडि समारोहलय् संकिपा क्षेत्रया न्हूपिं, पुलाँपिं कलाकार, प्राविधि, निर्माता, निर्देशकपिनिगु ब्वःति दूगु खः । ज्याझ्वलय् उत्कृष्ट नायकया अवार्ड विपिन कार्कीं चलचित्र “प्रसाद” पाखें कयादिल । अथेहे उत्कृष्ट नायिका चलचित्र “साइँली” पाखें मेनुका प्रधानं कयादीगु खः ।
अथेहे नायक अनमोन केसी व नायिका साम्राज्ञी राज्यलक्ष्मी शाहपिन्सं “पपुलर नायक–नायिका”या अवार्ड त्याकेत ताःलात । नेफ्टा लाइफटाइम एचिभमेन्ट अवार्ड धाःसा साउन्ड इन्जिनियर प्रदिपकुमार उपाध्याय व प्रकाश व्यवस्थापक नारायण तिमिल्सिनायात मू पाहाँ उपराष्ट्रपति नन्दबहादुर पुनं म्होतिं ५१द्वः ध्येबाया चेक व ताम्रपत्र लःल्हानादीगु खः ।
थीथी ३६गू विधाय ग्वःसाखलकं अवार्ड इनादीगु खः । वि.सं. २०७५ सालय् पिदंगु चलचित्रयात थूगुसी उगु अवार्ड बिउगु खः । नेफ्टाया नायः पुष्कर लामां सुनसान दूगु चलचित्र क्षेत्रयात नेफ्टा अवार्डं उत्साहित याःगु धयादिल । अथेहे ड्रिम हाई नेपालया नायः कमज जीसीं अगाडि झःझः धायेक क्वःचागुलिइ लसता प्वंकादिल ।
