११ क्वःगु नेवाः एकता दिवसयात थुगुसी नेवाः आन्दोलन दिवसया रुपं हनीगु जूगु दु । थीथी नेवाः मुद्दायात कयाः आन्दोलन यानाच्वंगु बिस्कं बिस्कं संघसंस्था व मोर्चा सकलें छथाय् च्वनाः नेवाः एकता दिवस ख्वनाया खुदोलय् हनीगु जूगु दु ।

थौं नेवाः देय् दबुलिं येँय् पत्रकार सम्मेलन यासें नेवाः आन्दोलनयात थप सशक्त दयेकेगु दिंकथं थुगुसीया नेवाः एकता दिवस हनेत्यनागु जानकारी बिल ।

दबूया नायः नरेश ताम्रकारं सडक विस्तार, फास्ट ट्र्याक लिसेंया सामाजिक मुद्दानिसें नेवाः स्वायत्त राज्यतक्कया राजनीतिक एजेन्डायात नं सशक्त ढङ्गं ल्ह्वनाः नेवाः आन्दोलनयात न्ह्यःने यंकेगु धयादिल ।

सरकारं नेवाः शक्तियात म्हमस्यूगु वा ल्वःमंकूगु खःसा गुथि विधेयकया आन्दोलन लुमंकेत ताम्रकारं चेतावनी बियादिल ।

थुगुसी ख्वनाया ऐतिहासिक सम्पदात न्हंकाः दयेकेत्यंगु फास्ट ट्र्याकविरुद्ध जुयाच्वंगु ख्वनाबासीया आन्दोलनय् ऐक्यवद्धता क्यँसें ख्वनाय् हे वनाः नेवाः एकता दिवस हनेत्यनागु वय्कलं जानकारी बियादिल ।

ज्याझ्वलय् नायः ताम्रकारं संविधान सभाया निगूगु निर्वाचनय् ब्वति कायेगु, संविधानयात लसकुस यायेगु कि वहिष्कार लिसेंया विषयस मतभेद जुयाः नेवाः स्वायत्त राज्य मंकाः संघर्ष समिति छुं ई निस्क्रिय जूगु ताम्रकारं स्वीकार यानादिल ।

‘राजनीतिक आस्थां छुं लिच्वः लाःगु समितिया सक्रियताय् ७२ सालया भुखाचं नं थप लिच्वः लात’ ताम्रकारया धापू खः । ‘आः नेवाः एकता दिवसया दिंनिसें एकिकृत रुपं नेवाः आन्दोलन झन सशक्त जुयाः न्ह्याःवनी ।’

वइगु पोहेंलाथ्व नवमी विहिबाः खोना घोषणा पत्र जारी गर्दै नेवाः एकता दिवस हनेत्यंगु दु । नेवाः स्वायत्त राज्यको आन्दोलनको निरन्तरताको प्रतिवद्धता, नेवाः समाजय् विभेद मदुगु हसनालिसेंया एकता प्रतिवद्धता, थीथी नेवाः संघसंस्थापाखें एकिकृत आन्दोलनया प्रतिवद्धता थुगुसीया नेवाः एकता दिवसया विशेषता जुइगु ग्वसाः खलकं न्ह्यथंगु दु ।

ने.सं. ११३० पोहेंलाथ्व नवमीया दिनस लखौं जन समुदायया उपस्थितीइ येँया दशरथ रंगशालाय् नेवाः स्वायत्त राज्य घोषणा जूगु दिंया लुमन्तिइ दँय्दसं नेवाः एकता दिवस हनावःगु दु ।

Categorized in राष्ट्रिय