ललितपुर उद्योग वाणिज्य संघया आः न्हुगु नेतृत्वया दाबी यानदीसे वरिष्ठ उपाध्यक्ष भरतलाल जोशी चुनावी मैदानय् क्वहावयादीगु दु।

अनुभवी व योग्यपिन्त नेतृत्व चयन यातकि संस्थागत क्षमता वृद्धि अप्वो जुइ धका जोशी शनिवाः जुइगु निर्वाचनया लागि चुनावी मैदानय् क्वहा वयादीगु दु । शुक्रवाः संघउा ४१ क्वःगु वार्षिक साधारण सभा जुइ त्यःगु दु। अथेहे शनिवाः निर्वाचन जुइ त्यःगु दु।  शनिवाः जुइगु निर्वाचनय् जोशी प्यानलसहित चुनावी मैदानय् क्वहावःगु दु। २०५३ सालय् कार्यसमिति सदस्यया रुपमा ज्यायानादीम्ह जोशीं ज्या यायेगु झ्वलय् कोषाध्यक्ष, महासचिव नाप बरिष्ठ उपाधक्ष्य तक जिम्मेवारी सम्हाले यानदीइ धुकुम्ह खः। थःगु अनुभव, कार्यसम्पादन हे चुनावी लिच्वः थःगु त्याइगु तधःगु आधार खः धका दावी यानादीगु दु । ‘आम व्यवसायीपिनिगु पीर, मर्का जि थु।

उकिया समाधान यायेगु योजना व इच्छाशक्ति जिके दु । थुकियात आम व्यवसायीपिन्स मुल्याकंन याइगु भलसा कयादीगु दु ।’ धका जोशी धयादीगु दु। जिल्लाया निजी क्षेत्रया छगु मंकाः संगठनया रुपय् संघयात बलाक्क तयेत थःगु उम्मेदवारी खः धका जोशीं धयादीगु खः। ‘जिल्लाय् करिब ५० हजार व्यवसायपि दु। सदस्यता काइपि निद्धःया हाराहारी जक दु । उकि सकसित सदस्यता बिइत थः पुरा हे खटे जुइ ।’ धका जोशीं धयादीगु दु। थःगु व्यक्तित्व, योग्यता व ज्याया आधारय् सदस्यपिन्स थःगु नेतृत्वय् ल्यइ धका भलसा न कयादीगु दु। लिपागु इलय् राज्यं याःगु अनुगमन व नियमनया नामय् व्यवसायपिन्त दुःख बिःगु धका धयादीसे जोशीं थः अध्यक्षय् निर्वाचित जुलकि राज्यया निकाय व व्यवसायपि मिले जुया समाधान मालेगु जुइ धका प्रतिबद्धता प्वकादीगु खः।

जोशीया प्यानलय् वरिष्ठ उपाध्यक्ष बालकृष्ण श्रेष्ठ, उपाध्यक्ष उद्योगपाखे अमिरराज ताम्रकार, उपाध्यक्ष वाणिज्यपाखे उसन बज्राचार्य, महासचिवय् सन्देश महर्जन व कोषाध्यक्षय् सचेन्द्रराज जोशी च्वनादीगु दु । अथेहे उद्योगपाखे कार्यसमिति सदस्यपि आपुलाल अवाले, कृष्ण श्रेष्ठ , गुणकेशरी ताम्रकार, राजु महर्जन, सजना श्रेष्ठ सुनील शाक्य ‘हान्ताई’ न जोशीया प्यानलपाखे उम्मेदवारी बियादीगु दु । अथेहे वाणिज्य तर्फ कार्यसमितिया सदस्यय् अनिल महर्जन, कृष्णप्रसाद सापकोटा, टेकरत्न बज्राचार्य, विमला शाक्य, रुपेन्द्रराज शाक्य, शम्भुप्रसाद बराही, सागर महर्जन व संस्थागत क्षेत्रपाखे पूर्णबहादुर महर्जन न उम्मेदवारी बियादीगु दु । योग्यता , क्षमता व क्रियाशीलताया हिसाबं चुनावी लिच्वः थःगु पक्षय् अत्यधिक सम्भावना दु धका जोशी प्यानलया पदाधिकारीपिन्स धाःगु दु।

Categorized in राष्ट्रिय