प्रधानमन्त्री व मन्त्रीपरिषदया कार्यालयया उपप्रधानमन्त्री ईश्वर पोखरेलं कोरोना संक्रमण नियन्त्रणया लागि सरकारं प्रभावकारी ज्या याना वयाच्वनागु दावी यानादीगु दु।

नेपालय् कोरोना संक्रमण नियन्त्रण व रोकथामया लागि लकडाउन, निषेधाज्ञा लगायतया आवश्यक पलाः इलय् छ्यलगु दु धका उपप्रधानमन्त्री पोखरेल १७ क्वःगु ज्यापु दिवसया लसताय् जुगु ज्याभ्वलय् अथे धयादीगु खः। माःगु आधारय् परिक्षण आः न जुयाच्वंगु दु धका दावी यासे सरकार क्वथलेत व ज्या याका मबिइगु प्रवृत्तीया कारण समस्या वःगु धका वयकलं धयादीगु खः।

१७ क्वःगु ज्यापु दिवसय् येँया राष्ट्रिय सभागृह जूगु ज्याझ्वलय् उपप्रधानमन्त्री पोखरेलं ज्यापु संस्कृतिया विकास लागि कोषय् थप गरी १ करोड थ्यकेगु वचं बियादीगु खः। ज्यापु दिवसया ग्वसाः ग्वया वयाच्वंगु ज्यापु संस्कृति विकास कोषय् आः ६० लाख दुगु खःसा वयात बढे याना छगु करोड थ्यका बिइगु बचं बियादीगु खः।

उगु ज्याझ्वलय् शिक्षा, विज्ञान तथा प्रविधिमन्त्री कृष्णगोपाल श्रेष्ठं ज्यापु संस्कृति विकास कोषया संस्थापक चक्रमान डंगोलयात लुमकादीगु खः।

अथेहे येँ महानगरपालिकाया मेयर विद्यासुन्दर शाक्यं गुठी विधेयकय् प्रधानमन्त्री पाखे पटक पटक सुझाव माग याःगु खःसा ठोस सुझाव मवःगु धका धयादीगु खः। गुिथ विधेयकय् छु माःगु खः? गुठी संस्थानया खारेज याये माःगु खःकि वाः उकि विकल्प छु जुइ फइ? धइगु ठोस सुझाव दयेकेत। झीसं गुथि संरक्षण जुइगु, अझ बालाक्क न्ह्याकेगु योजना दयेका न्ह्या वनेमाः धका मेयर शाक्य धयादीगु खः।

येँ  महानगरय् मूर्त अमूर्त सम्पदाया संरक्षणय् महानगरं छु न कसर बाँकि मतयागु दु धयादीसे शाक्यं सम्पदाया पुनर्निर्माण, जिर्णोद्धार यायेमाःगु अवस्थाय् महानगरयात वा थःगु न्ह्यने च्वंगु वडाय् सूचं बियादीत इनाप यानादीगु खः। उगु ज्याझ्वलय् ज्यापु संस्कृतिया विकासय् थःथःगु थासं योगदान बियादीपिन्त सम्मान ज्याझ्वः न जुगु दु ।

परम्परागत ओलाछी त्वाःया नायः मदनवीर महर्जनयात ज्यापु साँस्कृतिक धरोहर सम्मान व शिक्षा ख्यलय् ज्यापु सरस्वती पदक मनमैजु माविकी प्रधानाध्यापक रबिना महर्जनयात सम्मान याःगु खः। अथेहे ज्यापु रत्नपाखे व्यवसायी नाप उद्यमी रमेश महर्जनयात व साँस्कृतिक गुरु काजीलाल डंगोलयात सम्मान याःगु खः।

Categorized in राष्ट्रिय