येँ मेयर्स कप — २०७७ क्रिकेट कासाया लागि येँ महानगरं नेपाल क्रिकेट संघयात ५० लाख रुपैयाँ ग्वाहालि याःगु दु ।

थौं राष्ट्रिय सभा गृहय् छगु ज्याझ्वःया दथुइ मेयर विद्यासुन्दर शाक्यया उपस्थितिइ निगु पक्षया दथुइ ग्वाहालि सम्बन्धि सहमति पत्रय् ल्हाचिं तयादीगु दु । उगु सहमति पत्रय् महानगरया प्रमुख प्रशासकीय अधिकृत राजेश्वर ज्ञवाली व संघया अध्यक्ष चतुरबहादुर चन्दं ल्हाचिं तयादिगु खः। उगु ल्हाचिं तय् धुका थःगु खँ तयादीसे मेयर शाक्यं महानगरया प्राथमिक क्षेत्र पूर्वाधार, सम्पदा पुनर्निर्माण व शिक्षा स्वास्थ्य खः धयादीसे कासा ख्यलय् न विकास व प्रवर्दनया लागि विस्तारं लगानी अप्वोकाःगु खः धका धयादीगु खः।

‘जिमिसं वःगु दँय् महानगरपालिका दुने फुटवल क्लवयात ग्वाहालि यागु दु, मेयर शाक्यं धयादीगु दु, ‘वःगु इलय् ए डिभिजन फुटवल क्लवयात झीगु लाख, वी डिभिजनयात खुगु लाख व सी डिभिजनयात प्यगु लाख ग्वाहालि याये धुकगु दु । महानगरनाप फुटवलया माध्ययमपाखे देय् या म्हसिका अन्तराष्ट्रिय स्तरय् थ्यकेगु लागि थथे ग्वाहालि यानागु दु धका धयादीगु दु।’ शाक्यं फुटवल क्लवयात थे क्रिकेट क्षेत्रया विकासयात निरन्तर ग्वाहालि यायेगु वातावरण निर्माण यायेत व सम्झौता कथं इनाप याःगु दु। वयकलं अन्तराष्ट्रियस्तरय् न नेपाःया पहिचान तयेत सफल क्रिकेटनाप आवद्ध संस्थायात ग्वाहालि याये दया लय्ताःगु दु धका धयादीगु दु ।

‘राष्ट्रिय खेलाडीया मनोबल थकायेत व अन्तरराष्ट्रिय खेलाडी नेपाल वइगु इलय् थन याःगु सभ्यता महसुस याकेत महानगरं वःगु साफय् न ग्वाहालि यानागु दु,’ मेयर शाक्यं धयादीगु दु, ‘खेलाडी व खेलकुदप्रेमीपिन्त प्रोत्साहन जूइगु ज्या यात धाःसा वइगु दिं न थप ग्वाहालि यायेगु वातावरण निर्माण जुइ।’ वयकलं वइगु दँया बजेटय् खेलकुदयात प्राथामिकता बिया खेलाडीपिनिगु मनोवल थकायेगु ज्याय् केन्द्रित जुइगु जुइ धका धयादीगु दु।

उगु ज्याझ्वलय् प्रमुख प्रशासकीय अधिकृत ज्ञवालीं, क्रिकेटं अन्तरराष्ट्रिय स्तरय् नेपाःया म्हसिकेगु ज्या जुगु दु धका धयादीगु खः । अथेहे नेपाल क्रिकेट संघया अध्यक्ष चन्दं येँ महानगरपालिकां नेपाली क्रिकेटया स्तर थकायेगु व स्तरीय खेलाडी उत्पादनया लागि याःगु थुगु ग्वाहालि तसकं च्वछाय् वहः जुगु ज्या खः धका धयाद्यगिु खः।

Categorized in कासा