यलया भन्दाः क्यबय् करीब सच्छि दँ न्ह्यःनिसें दिनाच्वंगु ६ सः दँ पुलांगु छगू परम्परा हाकनं निरन्तर जूगु दु ।

दँय्दसं सिलाचः¥हेया दिं लाकाः भन्दाः क्यबय् दुगु मणिकेश्वर महाःद्यःया रुद्राभिषेक पूजा हाकनं न्ह्याःगु ख । वंगु बिहिबाः सिलाचः¥हेया दिनस भन्दाः क्यबय् मणिकेश्वर महाःद्यःया रुद्राभिषेक पूजा व सप्तसती चण्डी पूजा याःगु खः । पाटन संग्रहालयया पहलय् बिहिबाः यल तलेजुया पुजारीपिन्सं मणिकेश्वर महाःद्यःया रुद्राभिषेक पूजा व सप्तसती चण्डि पाठ याःगु खः ।

तलेजुया पूजारी वासुदेव ज्वालानन्द राजोपाध्यायं महाःद्यःया एकादश आवृत्ती रुद्राभिषेक पूजा याःगु खःसा रक्षण राजोपाध्यायं सप्तसती चण्डि पाठ याःगु खः । महाःद्यःया पूजा न्ह्यः क्षमापूजा नं याःगु खः । दिनाच्वंगु परम्परायात हाकनं न्ह्याकेत क्षमापूजा याःगु खः ।सिलाचः¥हेया दिनय् भन्दाः क्यबय् मणिकेश्वर महाःद्यःया रुद्रि याय्गु परम्परा ६ सः दँ स्वयां न्ह्यः हे न्ह्याःगु खः । भन्दाः क्यबय् दुगु छगू अभिलेख कथं थुगु मणिकेश्वर महाःद्यःया शिवलिङ्ग ने.सं ५३५ (वि.स. १४७१) पौष शूक्ल पुन्हि बुधबाःया दिनय् स्थापना जूगु खः ।

जयज्योतिर्मल्लको पालामा वंथुनिम्हयाम्ह यंकुलि वर्मा, वय्कःया जहान मदन लक्ष्मी व काय् जयसिंहसहित जुयाः शिवरात्री व्रत च्वनेत साढे ३ रोपनी जग्गा तयाः गुठी न्ह्याकाः उम्ह महाःद्यः स्थापना याय्गुया लिसें रुद्राभिषेक पूजा तकं न्ह्याकूगु खँ अभिलेखय् च्वयातःगु दु । ६ सः व ६ दँ पुलांगु थुगु परम्परा द्यूगु धाःसा यक्व हे दय्धुंकल ।

सच्छि दँ न्ह्यः हे थुगु परम्परां दिपाः काय्धुंकूगु खनेदुगु पाटन संग्रहालयया अधिकृत सुरेश लाखें धयादिल । लिपांगु खुसी थुगु रुद्राभिषेक पूजा गबले यात धइगु मिति यकिन यानाः धाय् मफइगु अधिकृत लाखेया धापू खः । ‘थन दुगु अभिलेख अध्ययन याय्धुंकाः सिलाचः¥हेया दिनय् थन रुद्राभिषेक पूजा याय्गु परम्परा दुगु खँ सिल’, लाखें धयादिल, ‘सच्छि दँ स्वयां अप्वः जुइधुंकल जुइ, थुगु परम्परा दिनाच्वंगु, थुगुसीया सिलाचः¥हेनिसें पुलांगु परम्परायात हाकनं निरन्तर याय्फत, गर्व महसूस जुयाच्वंगु दु ।’ पुलांगु परम्परायात हाकनं म्वाकेत थम्हं नं छुं योगदान बी खनाः गौरवान्वित जुयाच्वनागु पुजारी राजोपाध्यायं धयादिल ।

‘उलिमछि पुलांगु परम्परा दिनाच्वंगु जुयाच्वन, थः पुर्खां हिचःति हाय्काः न्ह्याकातःगु परम्परा छुं कारणं दिनावन, हाकनं थ्व न्ह्याकेत छुं योगदान बी खन, गौरवान्वित तायाच्वंगु दु’ राजोपाध्यायया धापू खः । बिहिबाः रुद्राभिषेक पूजा क्वचाय्धुंकाः वयां कन्हय्कुन्हुनिसें हे मणिकेश्वर महाःद्यःया नित्य पूजा नं न्ह्याःगु तलेजु पूजारी रक्षण राजोपाध्यायं धयादिल ।

Categorized in राष्ट्रिय