नेकपाया उपाध्यक्ष बामदेव गौतमं अध्यक्षपि केपी शर्मा ओली व पुष्पकमल दाहाल ‘प्रचण्ड’ यात तत्काल पार्टी सचिवालयया बैठक च्वनेगु माग याःगु दु।

संसद विघटन बदर जुइवं उकिया सहलह यायेगु लागि गौतमं सचिवालय बैठक च्वनेगु माग याःगु दु। गौतमं थौं सार्वजनिक याःगु प्रेस विज्ञप्तिइ धाःगु दु, ‘नेपाल कम्युनिष्ट पार्टी (नेकपा) या उपाध्यक्ष जुगु हैसियतं जि निम्ह अध्यक्षपि क. केपी शर्मा ओली व क. प्रचण्डयात याकन हे सचिवालय बैठक धुम्वाराहीया पार्टी केन्द्रीय कार्यालयय् सत्यःत इनाप यानागु दु ।’

गौतमं राष्ट्रपति विद्यादेवी भण्डारीयात सर्वोच्च अदालतया फैसलायात लसकुस याना प्रतिनिधि सभा अधिवेशन आह्वान यायेत व प्रधानमन्त्री केपी शर्मा ओलीयात याकन हे पदपाखे राजीना बिइत सुझाव बिःगु दु। सर्वोच्च अदालतं संसद विघटनयात बदर याःगु फैसलायात गौतमं ऐतिहासिक धाःगु दु ।

संसद विघटन बदर जुगु दिंयात वयकलं निरंकुशता, स्वेच्छाचारीता, अराजकता व दुराचारीताया पराजय नाप संविधान, कानुन, लोकतन्त्र व जनताया सर्वभौमिकता पुनर्विजय प्राप्त जुगु ऐतिहासिक दिंया रुपय् उल्लेख याःगु दु ।

Categorized in राजनीति