२०८० चैत्र १५, बिहिबार

चेल्सीं एभर्टनयात २–० या गोल अन्तरं बुकल

सिल्लागा एकादशी ११४१, फागुन २५ मंगलवाः

इंग्लीश प्रिमियर लिग फुटबलय् चेल्सीं एभर्टनयात २–० या गोल अन्तरं बुकुगु दु ।
 
वंगु चान्हय् थःगु हे मैदानय् जूगु कासाय् चेल्सीयात त्याका बिइत जर्गीनों पेनाल्टीपाखें छगू गोल याःगु खः । एभर्टनया बेन गडफ्रें छगू आत्माघाति गोल यायेधुंका चेल्सीं अपूक कासा त्याकुगु खः ।
 
जर्मन प्रशिक्षक थोमस टुकेलयात भाला बिइधुंका चेल्सीं छगू नं कासा बूगु मदुनि । टुकेलया नेतृत्वय् चेल्सीं ६गू कासा त्याकुगु दुसा ३गू कासा ज्वलिन्ज्वः म्हितुगु दु ।
 
प्रिमियर लिगया हे मेगु कासाय् वेष्ट ह्याम युनाईटेडं लिड्स युनाईटेडयात २–०या गोल अन्तरं बुकुगु दु ।
 
कासाय् वेष्ट ह्यामयात त्याकेत जेस्सी लिङ्गार्ड व क्रेग डसनं छगू छगू गोल याःगु खः ।
 
वंगु चान्हय्सिया कासालिपा इंग्लीश प्रिमियर लिग फुटबलया ल्याः धलःखय् २८गू कासां ६५गू ल्याः मुंकुगु म्यान्चेस्टर सिटी शिर्ष थासय् यथावत दु ।
 
उतिग्यंक कासापाखें ५४गू ल्याः मुंकुगु म्यान्चेस्टर युनाईटेड निगूगु थासय् दूबलय् ३गूगु थाय्या लेष्टर सिटीया ५३गू ल्याः जूगु दु ।
 
५०गू ल्याः मुंकुगु चेल्सी ४गूगु थासय् दूबलय् ४८ गू ल्याः नापं वेष्ट ह्याम युनाईटेड ५गूगु थासय् दु ।
 
Categorized in कासा