म्यानमारय् सेनाया ’कू’ विरुद्ध जुयाच्वंगु प्रदर्शनय् शिक्षक व विद्यार्थीपि न सहभागी जुगु दु। आम नागरिकपि प्रदर्शनय् पिहावःगु शिक्षक व विद्याथीपि न प्रदर्शनय् सहभागी जुयावःगु दु धका बीबीसीें धाःगु दु ।

म्यानमारया तधःगु सहर यांगुनया छगु विश्वविद्यालययय् प्रदर्शनकारीपिन्स जेलय् कुनातःम्ह आङ सान सुकी नाप मेपि नेतापि रिहाइया माग याःगु दु। प्रदर्शनय् कुहवःपिन्स थःगु कापतय् ह्यागू रिबन तया वःगु खः । ह्यागू  रंग सुकीया पार्टीया रंग खः । सलःसं विद्यार्थी व शिक्षकपि यांगुनया विश्वविद्यालय पिने जम्मा जुया विरोध प्रदर्शन याःगु दु धका धाःगु दु ।

उमिसं सुकीया समर्थनय् नाराबाजी याःगु खः। सैन्य ’कू’ लिपा नेतृ सुकी नाप मेपि नेतापिन्त हिरासतय् तःगु खः। वःगु सोमवाः सुथय् सेनां नेतृ आङ सान सुकी नाप मेपि नेतापिन्त न गिरफ्तार याना सत्ता थःगु ल्हातय् काःगु खः। विश्व समुदायपिन्स म्यानमारय् जुगु सैन्य ’कू’ या विरोध याना वयाच्वंगु खः ।

Categorized in अन्तर्राष्ट्रिय