आर्सनलं लिड्स युनाइटेडयात ४–२गूया गोल अन्तरं बुकल, वेष्ट ब्रोम व म्यान्चेस्टर युनाइटेड दथुया कासा ज्वलिन्ज्वःलय्
सिल्लाथ्व चतुर्थी ११४१, फागुन ३ सोमवाः
इंग्लीश प्रिमियर लिग फुटबलय् आर्सनलं लिड्स युनाईटेडयात ४–२गूया गोल अन्तरं बुकुगु दु ।
वंगु चान्हय् थःगु हे ख्यःलय् जूगु कासाय् आर्सनलयात त्याकेत पिएरे एमरिक औबामायङ्गं ह्याट्रिक याःगु खःसा हेक्टर बेलेरिनं छगू गोल याःगु खः । बूगु टोली लिड्स युनाईटेडया पास्कल स्ट्रीक व हेल्डर कोष्टां छगू छगू गोल याःगु खः ।
कासा त्यागु नापं आर्सनल प्रिमियर लिग फुटबलया ल्याः धलःया १०गूगु थासय् थ्यंगु दु । वंगु चान्हय् जूगु मेगु कासाय् म्यानचेस्टर युनाईटेडयात धाःसा वेष्ट ब्रोमं १–१गू गोलया ज्वलिन्ज्वःलय् पंगु दु ।
अथेहे फुल्हमं एभर्टनयात २–०या गोल अन्तरं बुकुबलय् वुल्भरह्याम्पटन वान्डरर्सं साउथह्याम्पटनयात २–१गूया गोल अन्तरं बुकुगु दु । इंग्लीश प्रिमियर लिगय् थौं चान्हय् निगू कासा जुइ ।
थौं चेल्सी व न्युकासल युनाइटेड लिसें वेष्ट ह्याम युनाईटेड व शेफिल्ड युनाईटेड दथुइ कासा जुइ ् ।
