म्यान्चेस्टर सिटी च्याम्पियन्स लिगया फाईनलय्
चौलागा नवमी ११४१,बैसाख २२ बुधवाः
इंग्लीश क्लब म्यान्चेस्टर सिटी न्हापांखुसिइ युरोपियन च्याम्पियन्स लिग फुटबलया फाइनलय् थ्यंगु दु ।
वंगु चान्हय् जूगु सेमिफाईनल निगूगु लेगया कासाय् फ्रान्सया पेरिस सेन्ट जर्मेन (पिएसजी)यात २–० या गोल अन्तरं बुका म्यान सिटी मुक्कंलय् ४गू–१गूया लिच्वः नापं फाइनलय् थ्यंगु खः ।
थ्वयान्ह्यः पिएसजीया मैदानय् जूगु न्हापांगु लेगया कासाय् म्यान्चेस्टर सिटी २–१गूया गोल अन्तरं त्यागु खः । वंगु चान्हय्सिया कासाय् म्यान सिटीयात त्याकेत निगुलिं गोल अल्जेरियन कासामि रियाद माहारेजं याःगु खः ।
न्ह्यानाच्वंगु सिजनया इंग्लीश प्रियिमर लिगय् तकं शीर्ष थासय् दूगु म्यान्चेस्टर सिटीयात स्पेनिस प्रशिक्षक पेप ग्वार्डीयोलां च्याम्पियन्स लिगया फाइनल् थ्यंकुगु खः ।
म्यान सिटीं आः फाइनलय् इंग्ल्याण्डया हे चेल्सी वा स्पेनया रियाल मड्रिडमध्ये छगु टोलीलिसे म्हितिइ । सेमिफाईनल निगूगु लेगया कासाय् थौं चान्हय् चेल्सी व रियाल मड्रिड दथुइ कासा जुइ ।
रियाल मड्रिडया मैदानय् जूगु न्हापांगु लेगया कासा १गू–१गू गोलया ज्वलिन्ज्वःलय् क्वचागु खः ।
Categorized in कासा
