मेलम्ची खानेपानी आयोजनाया सुरुङय् थौं परीक्षण याइगु, औपचारिक ज्याझ्वः यानाः लः जायेकीगु
लहना न्यूज | सिल्लाथ्व दशमी ११४१, फागुन १० सोमबाः
मेलम्ची खानेपानी आयोजनाया सुरुङय् थौं परीक्षण यायेत्यंगु दु । २६.५ किलोमिटर ताःहाकःगु सुरुङय् थौंनिसें लः जायेकाः परीक्षण यायेत्यंगु दु ।
आयोजनास्थल मेलम्चीइ औपचारिक ज्याझ्वः यानाः लः जायेकीगु धागु दु । खानेपानी मन्त्री मणि थापां थौं सुथय् ११ताः ईलय् सुरूङय् लः जायेकीगु ज्यायात उलेज्या याइगु मेलम्ची खानेपानी विकास समितिं धागु दु ।
सिन्धुपाल्चोकया मेलम्ची खुसिनिसें येँया सुन्दरीजलतकया २६.५ किलोमिटर सुरुङ जायेकेत १५न्हुनिसें २०न्हु बी । सुरुआती चरण जूगुलिं सुरुङया क्षमता कथं लः त्वःती मखुनि ।
वंगु असारय् सुरुङय् लः जायेकाः परीक्षण याःगु खः । तर १७गु नम्बरया गेट तज्यानाः पिहाँवःगु लखं आयोजनाया छम्ह इन्जिनीयर व चालकयात चुइकायंकूगु खः ।
अनलिं आयोजनाया मुख्य दातृ निकाय एशियाली विकास बैंकया अनुदान ग्वहालिअन्तर्गत प्यम्ह विशेषज्ञपिनिगु पुचलं सुरुङ, मुहानस्थल, गेटनापया संरचना हाकन जाँच यानाः मर्मत याःगु खः ।
मेलम्चीं दैनिक १७गु कोती लिटर लः स्वनिगः वइगु धागु दु ।
Categorized in राष्ट्रिय
