म्यानमारय् आन्दोलनकारीविरुद्ध दमन मयायेत अन्तर्राष्ट्रिय समुदायया ख्याच्वः
सिल्लागा द्धादशी ११४१, फागुन २६ बुधवाः
म्यानमारय् सैन्य कु या विरोधय् न्ह्यानाच्वंगु देय्न्यंकंया ब्वज्या अझं मद्यूनि । थ्वहेदथुइ सत्तारुढ दलया छम्ह नेता हिरासतय् हे सीगु दु ।
सुरक्षाकःमिंपिन्सं अत्याधिक यातना ब्यूगुलिं आङसाङ सूकीया दल नेशनल लिग फर डेमोक्रेसी (एनएलडी)या नेता झा म्याटलिन सीगु धागु दु ।
सैन्य शासनया विरुद्धय् मदिक्क न्ह्यानाच्वंगु आन्दोलनं वय्कयात नियन्त्रणय् काःगु खः । सुरक्षाकःमिपिन्सं नियन्त्रण काःम्ह एनएलडीया नेता सीगु विषययात अन्तर्राष्ट्रियकरण याःगु दु ।
विघटित संसद्या च्वयेया सदनया सांसद म्याटलिन हिरासतय् सीम्ह निम्हम्ह नेता जूगु अधिकारीपिन्सं धागु दु । एनएलडीया मेम्ह नेता खिन मौन लाट वंगु शनिवाः सेनाया हिरासतय् सीगु खः ।
सेनां वंगु फेब्रुअरी १ तारिखय् आङसाङ सूचीया निर्वाचित सरकारयात चिइकाः सैन्य शासन लागू याःगु दु । नोभेम्बरय् जूगु निर्वाचनय् धाँधली जूगु धासें सेनां जननिर्वाचित सरकारयात चिइकाः सत्ता ल्हातय् कायेवं संकटकाल तःगु दु ।
थ्वहे ज्यापहःयात विरोध यानाः म्यानमारय् लिपांगु ई देय्न्यंकं ब्वज्या न्ह्यानाच्वंगु दु । विरोध ब्वज्याय् कुहाँवःपिन्त सुरक्षाकःमिपिन्सं अत्याधिक दमन याःगु धासें संयुक्त राष्ट्रसंघनाप थीथी अन्तर्राष्ट्रिय संघ संस्थां वाः चायेकूगु दु । इमिसं आन्दोलनकारीपिनिगु मानवअधिकार रक्षा यायेत नेतृत्वयात तारन्ताः ध्यानाकर्षण याकूगु दु ।
अथेखःसां आन्दोलनकारीपिन्त दमन यायेगु झ्वः मद्यूनि । विरोध ब्वज्याया झ्वलय् आःतक ६०म्ह मनूत सीधुंकूगु दु । द्वछि व ८सःम्हेसित सुरक्षाकःमिपिन्सं ज्वनायंकूगु दु ।
Categorized in अन्तर्राष्ट्रिय
