नेपाल कम्युनिस्ट पार्टी (नेकपा) या ओली पक्षं अखिल नेपाल महिला सङ्घ (अनेमसङ्घ) नं नेकपा प्रचण्ड–माधव पक्षया नेतृ नाप विघटित प्रतिनिधि सभा सदस्य रामकुमारी झाँक्रीयात ज्वना कारबाही याये माःगु माग याःगु दु ।

थौं बुधवाः गृहमन्त्री रामबहादुर थापायात ज्ञापन पत्र बुझे यासे अखिल नेपाल महिला सङ्घं माघ १६ गते गोरखाया सिरानचोक गाउँपालिकाय् छगू ज्याझ्वलय् नेकपा प्रचण्ड–माधव पक्षया नेतृ रामकुमारी झाँक्रीं राष्ट्रपति विद्यादेवी भण्डारीया चारित्रिक हत्या याःगु धाःसे ज्वना कारबाही याये माःगु माग याःगु दु ।

उगु ज्ञापन पत्रय् नेतृ झाँक्रीं राष्ट्रपति भण्डारीया चारित्रिक हत्या यासे थीथी द्धपः बिया बेइज्जती यागु नाप व्यक्तिगत, पारिवारिक व राष्ट्रपतिया हे इज्जतय् तक धक्का जुइ नियतपाखे हे आपत्तिजनक व अपमानजनक शब्द छ्यगुलि ज्वना कानुनबमोजिम कारबाही याये माःगु माग याःगु खः।

अनेमसङ्घया नेतृ सुजिता शाक्यं झाँक्री नं राष्ट्रपति संस्थाय् हे अपमानजनक व्यवहार याःगुलि तत्काल कारबाही यायेत माग याःगु दु।

Categorized in राष्ट्रिय