सिंगटी हाइड्रो इनर्जी लिमिटेडं थौंनिसे सर्वसाधारण धितोपत्रया प्रारम्भिक निष्कासान सार्वजनिक (आईपीओ) बिक्री याइगु जुगु दु ।

न्हापागु चरणय् आयोजना प्रभावित दोलखाय् स्थानीयपिन्त आईपीओ बिक्री याःगु खःसा आः कम्पनीं निगु चरणय् सर्वसाधारणया लागि आईपीओ बिक्री याये त्यःगु खः ।

कम्पनीं छगु सेयर १०० रुपैयाँ अंकित मूल्य २९ लाख कित्ता साधारण सेयर बिक्री खुला यायेत्यःगु खः। उकि मध्ये ५ प्रतिशत अर्थात् १ लाख ५४ हजार कित्ता सामूहिक लगानी कोषया लागि व २ प्रतिशत अर्थात् ५८ हजार कित्ता कर्मचारीया लागि सुरक्षित याःगु दु । ल्यदनिगु २६ लाख ९७ हजार कित्ताया लागि सर्वसाधारणं आवेदन बिइ फइगु जुगु दु।

कम्पनीं नेपाल धितोपत्र बोर्डपाखे जारी १ अर्ब ४५ करोडया १० प्रतिशत स्थानीय आयोजना प्रभावित व २० प्रतिशत सर्वसाधारणया लागि बिक्री यायेगु अनुमति बिःगु खः ।

उकि कम्पनीं थ्व स्वया न्ह्यः हे आयोजना प्रभावित क्षेत्र दोलाखाया बिगु व कालिञ्चोक गाउँपालिकाय् स्थानीयया लागि सेयर बिक्री याःगु खः। कम्पनीया स्थानीय आयोजना प्रभावितया लागि १४ करोड ५० लाख रुपैयाँ बरारबया १४ लाख ५० हजार कित्ता सेयर बिक्री याःगु खः ।

मेगा क्यापिटल मार्केट लिमिटेड बिक्री प्रबन्धकय् कम्पनीया आईपीओ सर्वसाधारणं याकन चैत १० गते तक आवेदन बिइ फइ । उगु इलय् पर्याप्त आवेदन मवःसा चैत २० गते तक म्याद थप याये फइ । सर्वसाधारणं आईपीआ न्यूनतम १० कित्ता निसे अधिकतम २ लाख कित्ता तक आवेदन बिइ फइ ।

Categorized in राष्ट्रिय