२०८० चैत्र १६, शुक्रबार

स्पोर्ट्स अवार्डय् उत्कृष्ट नेवाः कासामि

प्रजित शाक्य | पोहेलागा तृतीया ११४१, माघ १८ आइतवाः

कासा पत्रकारतय्गु संस्था नेपाल खेलकुद पत्रकार मञ्चं दँय्दसं भव्य समारोह यानाः दच्छियंकं उत्कृष्ट प्रदर्शन याइपिं कासामि, प्रशिक्षक व मेपिं खेलकर्मीतय्त सम्मान याय्गु परम्परा दु । स्पोर्ट्स अवार्डया नामं थुकिया म्हसिका दु । थुगुसी कोरोनाया महामारीं यानाः स्पोर्ट्स अवार्ड पाय्छि इलय् जुइमफुत । नेपाःया खेलवृत्तय् थुगुसी स्पोर्ट्स अवार्ड जुइगु बारे शंका ब्वलन । स्पोर्ट्स अवार्ड जुइमखत धकाः कासामि त ला निराश हे जुल । सरकारी निकायपाखें कासामितय्त माःकथं बांलाक पुरस्वृmत मयाइगु, बांलाक हनाबना मतइगु अवस्था अले थुखे स्पोर्ट्स अवार्डय् कासामि ल्यय्गु ज्या निष्पक्ष व पारदर्शी जुइगुलिं नं स्पोर्ट्स अवार्ड कासामितय्सं पियाच्वनीगु ज्याझ्व खः ।

खेलकुद पत्रकार मञ्चं कासामितय्त निराश मयाः । २०७६ सालय् नेपालय् दक्षिण एसियाली खेलकुद (साग) जूगुलिं नं कासा पत्रकारत स्पोर्ट्स अवार्ड याय्त बाध्य जुल । नेपालं ५१ स्वर्ण पदक त्याकाः ऐतिहासिक प्रदर्शन यागु दँय् थुगु ज्याझ्वः याय्मखंसा स्पोर्ट्स अवार्डया इतिहासय् हे विडम्बना जुइगु खेल पत्रकारतय्सं ताय्कल । उकिं लांलां लिबाःसां, सेमी भर्चुअलरुपं जुसां खेल पत्रकारतय्सं स्पोर्ट्स अवार्डया १७ क्वःगु संस्करण यानां हे त्वःतल । थुगुसी नेपालय् जुगु १३ क्वःगु दक्षिण एसियाली खेलकुद (साग) य् पदक त्याकेत ताःलाःपिं कासामितय्गु हे वर्चश्व दत । कराँते कासामि मन्डेकाजी श्रेष्ठ सर्वश्रेष्ठ मिजं कासामि, जलपरी गौरिका सिंह सर्वश्रेष्ठ मिसा कासामि, गल्फर सुभाष तामाङ सर्वश्रेष्ठ युवा कासामि, तेक्वान्दोया नवीनकुमार श्रेष्ठ वर्षया सर्वश्रेष्ठ प्रशिक्षक घोषित जुल ।

स्पेशल अवार्ड नं थुगुसी सागय् चम्के जूपिं धाविका सन्तोषी श्रेष्ठ व तेक्वान्दोया आयशा शाक्ययात संयुक्तरुपं  बिल । पिपल्स च्वाइस अवार्डया पुरस्कार राष्ट्रिय महिला भलिबल टिमया कप्तान अरुणा शाहीं त्याकल । टेबलटेनिसया हस्ती कासामि जोडी सिजरिन शाह र गीता क्षेत्रीयात लाइफटाइम एचिभमेन्टं विभूषित यात । डिगमसिंह चेम्जोङयात पारा एथलेट सम्मान बिल । एसियन स्पोर्ट्स जर्नालिस्ट अवार्ड मलेसियाया खेल पत्रकार अहमद खवारी इसायात प्रदान यात । नेपाली महिला भलिबल पुचः टिम अफ दि इयरपाखें सम्मानित जुल । थुकथं थुगुसी झिगू विधाय् खेलकर्मी सम्मानित जुल । सम्मानितया धलखय् नेवाः कासामितय्गु नां नं दु । अथेला नेपाली खेलकुदय् नेवाः कासामितय्गु योगदान न्हूगु खँ मखु । बैकुण्ठ मानन्धरं म्याराथनय् न्हाप लानाः नेपाःयात सागया हे दक्कले न्हापांगु स्वर्ण पदक ब्यूगु खः ।

मानन्धरं लगातार स्वकः म्याराथनय् स्वर्ण पदक त्याकाः इतिहास हे कायम यागु दु । एसियाडय् दक्कले न्हापां रजत पदक त्याकाः इतिहास दय्कूम्ह सविता राजभण्डारी नं नेवाः कासामि हे खः । तेक्वान्दो कासामि सवितां सन् १९९८ य् बैंकक एसियाडय् काःगु रजत पदक आःतक्कया हे नेपाःया दक्कले तःधंगु पदक खः । छनोट चरण पार यानाः ओलम्पिक म्हितेत ताःलाम्ह नेपाःया न्हापाम्ह कासामि तेक्वान्दो लिजेन्ड संगिना वैद्य नं नेवाः हे खः । अथे हे सागय् यक्वः नेवाः कासामितय्सं पदक त्याका नेपाःया न्हाय् धस्वाकूगु दु । नेवाः कासामितय्स तःगु थज्याःगु गौरवया दसु यक्व हे दु । थुगुसीया स्पोर्ट्स अवार्डय् नं मन्डेकाजी, नवीनकुमार, आयशा, सन्तोषीं नेवाःतयग्गु क्षमता क्यन । 

मण्डेकाजी श्रेष्ठ (कराँते), दँया उत्कृष्ट मिजं कासामि

मन्डेकाजीया नितिं २०७६ साल तसकं बांलात । थहां वनाच्वंगु उमेरं नं मन्डेकाजीयात सागय् थःगु खेल जीवनया सर्वश्रेष्ठ प्रदर्शन याय्त पनेमफूत । मन्डेकाजीं १३ क्वःगु सागय् निगु स्वर्ण पदक त्याकल, टिम काता व इन्डिभिजुअलय् । १३ क्वःगु सागय् नेपाःया निंति स्वर्ण पदकया बोहनी याःम्ह मन्डेकाजी हे खः । उलि जक मखु बंगलादेशय् जुगु साफ च्याम्पियनसिपय् टिम काताय् स्वर्ण व एकल काताय् काश्य पदक त्याकल । थाइल्यान्ड ओपन च्याम्पियनसिपय् सिनियर काता. विधाया फाइनल म्हितल । च्यामिपयन जुइमफुसां व च्याम्पियन्सीपय् मन्डेकाजी उत्कृष्ट कासामि घोषित जुल । अथेहे राष्ट्रिय खेलकुदया च्यागूगु संस्करणय् नं मन्डेकाजीं एकल काताय् स्वर्ण व टिम काताय् रजत पदक क्वखात । २०७६ सालय् थुलिमछि उपलब्धि हासिल याःगुलिं थुगुसी मन्डकाजीं उत्कृष्ट मिजं कासामि घोषित जुइ धइगु ओपन सेक्रेत थें हे जुल । उत्कृष्ट मिजं कासामिंया मनोनयनय् मेपिं निम्ह नेवाः कासामित तेक्वान्दोया कमल श्रेष्ठ व राष्ट्रिय फुटबल पुचःया गोलकिपर विकेश कुथुं नं थःगु उपस्थिति क्यंगु खः । अथेला सर्वश्रेष्ठ युवा कासामिया मनोनयनय् लानाः नेवाः कासामित भुपेन श्रेष्ठ (तेक्वान्दो) व पुनम श्रेष्ठं (जुडो) नं स्पोर्ट्स अवार्डय् थःगु उपस्थिति क्यन ।

स्पेसल अवार्ड सन्तोषी श्रेष्ठ (एथलेटिक्स)

१३ क्वःगु सागय् १० हजार मिटर दौडया अन्त्य फिल्मया रोमाञ्चक क्लाइमेक्स थें जुल । सन्तोषीं सासः हे दी धेंधें बल्लाखय् फोटो फिनिसय् स्वर्ण पदक त्याकल । १० हजार मिटर थज्याःगु ताःहाकःगु दुरीया दौडय् थज्याःगु अन्त्य दुर्लभ हे जुइ । अझ नेपालीत ट्रयाक एन्ड फिल्डय् सिक्क हे कमजोर । अथेखःसां सन्तोषीं एसियाया हे छम्ह नांजाःम्हः श्रीलङ्काली धाविका हिरुनी केसारा व भारतया कविता यादवयात ल्युने लाकल । उकिं नं सतोषीया स्वर्ण स्पेसल जुल । ७० द स्वयां ताःहाकःगु इतिहास दुगु एथलेटिक्सय् स्वर्ण पदक त्याकेत ताःलाःम्ह सन्तोषी नेपाःया हे दक्कले न्हापाम्ह मिसा धाविका खः ।

आयशा शाक्य (तेक्वान्दो)

१३ क्वःगु सागय् तेक्वान्दोया आयशां निगू स्वर्ण पदक त्याकाः फुक्कसितं अजू चाय्काबिल । निम्ह सन्तानया मां जुयाः आयशां तेक्वान्दोय् याःगु पुनरागमन अले त्याकूगु निगू स्वर्ण तुलना हे याय्मफइगु सफलता जुल । सन् २००६ स एसियाली खेलकुदय् काश्य पदक त्याकाः आयशां थःगु छाप त्वःते धुंकूगु खः । गुदँ न्ह्यः हे सागय् नं वय्कलं स्वर्ण पदक त्याकेधुंकूगु खः । अथेखःसां थुगुसीया स्वर्ण आयशाया निंति स्पेसल जुल । निम्ह सन्तानया मां जुयाः देय्यात ब्यूगु स्वर्णं आयशायात वीरङ्गना मांया पहिचान व चर्चा बिल । आयशां सागया छगू संस्करणय् निगू स्वर्ण पदक त्याकूम्हः न्हापांम्ह मिसा कासामिया कीर्तिमान कायम यात । उकिं यानाः आयशाया नां नेपालयात उच्च सफलता ब्यूपिं मिसा कासामिया धलदय् नं अझ थहांवंगु दु । नवीन श्रेष्ठ (तेक्वान्दो), सर्वश्रेष्ठ प्रशिक्षक नेपाःयात अन्तर्राष्ट्रिय खेलकुदय् दक्कले अप्वः स्वर्ण पदक बीत ताःलाःगु कासा खः तेक्वान्दो । अथेखःसां नेपाःया तेक्वान्दो ताःई न्ह्यःनिसें थःगु आज्जु कथं पाय्छि लँपुइ वने मफयाच्वंगु खः ।

नवीन श्रेष्ठं

अन्तर्राष्ट्रिय धेंधें बल्लाखय् कुहां वनाच्वंगु अवस्थायात ह्वात्त हे थकाल । नेपाःया तेक्वान्दोया प्रमुख प्रशिक्षक खः नवीन । १३ क्वःगु सागय् नेपालं तेक्वान्दो कासाय् दक्कले अप्वः १२ स्वर्ण, खुगू रजत व ११ काश्य पदक त्याकल । थुकथंया ल्वःमंकां ल्वःमंके मफयगु प्रदर्शन लिपा नवीन निर्विवाद दँया उत्कृष्ट प्रशिक्षक घोषित जुल । नवीनया प्रशिक्षकत्वय् साग म्हितूपिं सकल २९ कासामित पदक त्याकेत ताःलाःगु खः ।