नविताया एकेडेमीइ आः खुगू टेबल टेनिस बोर्ड तयातःगु दु । अन स्वंगू सत्रय् प्रशिक्षण जुइ ।  उगु एकेडेमीइ राकेश महर्जन प्रमुख प्रशिक्षकया रुपं दी । अथे हे, च्याक्वःतक्क राष्ट्रिय च्याम्पिययन जुइधुंकूम्ह नवितालिसें एलिना महर्जनं नं थुगु एकेडेमिइ टेबलटेनिसया प्रशिक्षण बियादी । वय्कःपिं स्वम्ह छगू हे परिवारयापिं खः । राकेश नविताया हे जीवन पासा खःसा एलिना नविताया केहेँभत खः ।

 

थुगु एकेडेमि छन्हु निन्हु वा लच्छि निलाया योजनां न्ह्याःगु मखु । एकेडमी चायेकेत नवितां यक्व हे दुग्यंगु गृहकार्य यानादीगु दु । नविताया थुगु एकेडेमी तःदँया योजनाया साकार रुप खः धाःसां पाइमखु । ‘ब्याचलरया अध्ययन क्वचाय्धुंकाः जहान (राकेश) यात टेबलटेनिस एकेडेमी चाय्केगु थःगु म्हगसया बारे कनागु खः । न्ह्याबलें जितः साथ बीम्ह वय्कलं थ्व खँय् नं जिगु समर्थन यानादिल । राकेश जक मखु, परिवारं हे साथ बियाः जितः हःपाः बियादिल’ नबितां कन । थःगु टेबलटेनि एकेडेमि चाय्केगु म्हगसनिसें थुकिं साकार रुप काःगु ईया यात्रायात नवितां तनायंकल, ‘व धुंकाः टेलबटेनिस एकेडेमी चाय्केगु हे बिचाः ज्वनाः एमबीए नं याना ।

 

टेबलटेनिस संघया सरपिं नं जिगु योजनाय् सकारात्मक जुयादिल । व धुंकाः टेबलटेनिस संघपाखें प्रशिक्षकया रुपं न्हापांगु इन्टरनेसनल प्राजेक्ेट चूलात । संघं जितः एसियन टेबल टेनिस युनियनया एम फर फ्युचरय् प्रशिक्षक नियुक्त याःगु खः । गुगु प्रोजेक्ट अन्तर्गत जिगु थःगु प्रशिक्षणय् कासामियात भारत यंका । अन छम्ह प्रशिक्षकया रुपं यक्व खँ सय्केखन । थाइल्यान्ड लिसें मेगु देशय् नं म्हितः वनाबलय् अनया कासामिं थःगु प्रदर्शन गुकथं सुधार यात, एकेडेमी गुकथं न्ह्यानाच्वंगु दु धइगु बारे अध्ययन यानावया । थुकिं जिगु आत्मविश्वास झन बल्लाकल । व धुंकाः एकेडेमीया लागि हल माला । लकडाउनया ईयात सदुपयोग यानाः व हे लकडाउनया इलय् टेबलटेनिस एकेडेमी हल दय्केगु ज्या नं क्वचाय्का ।’

 

नविताया एकेडेमी चाय्केगु म्हगस पूवंकेत स्ट्याग इन्टरनेसनलया नं साथ दुगु जुल । नविताया टेबलटेनिस एकेडेमीया लागिं स्ट्यागं कासा ज्वलनय् निश्चित् प्रतिशत छ्यापं बी । व बाहेक स्ट्यागय् आवद्ध २०९ राष्ट्रलिसे नं नविताया एकेडेमी एक्सचेन्ज प्रोग्रामय् दुथ्याय्फइ । थुकिं नं नविताया एकेडेमियात अन्तर्राष्ट्रिय स्तरय् थ्यंकेत तःधंगु ग्वाहालि व तिबः जुइगु खनेदु । नविताया कथं स्ट्याग इन्टरनेसल एकेडेमीया आज्जु नं मुक्कं नेपाली टेबलटेनिस ख्यःयात ग्वाहालि याय्गु, च्वन्ह्याकेगु हे खः । 

नवितां थःगु योजना व आज्जु न्यंकायंकल, ‘फयांफक्व यक्व बाँबांलाःपिं टेबलटेनिस कासामिया उत्पादन याय्गु जिगु इच्छ खः ।

 

गुलिखे प्रतिभावान, क्षमतावान कासामिपिन्सं नं एकेडेमी मदुबलय् थुगु कासा त्वःतूगु जिं खनागु दु । थीथी स्कुलय् कोचिङ यानाबलय्या अनुभव कथं नं स्कुलय् बांलाक म्हितीगु तर स्कूल धुंकाः बांलाःगु एकेडेमी मदयाः ख्यः त्वःताछ्वःपिं नं यक्व हे खनेधुन । आः जिमिगु एकेडेमीं थज्याःगु अवस्थाया परिपूर्ति याइ । अथे हे, थुगु एकेडेमीइ छात्रवृत्तिया व्यवस्था नं दु । प्रतिभा दुपिं तर धेबा पुले मफुपिं कासामियात छात्रवृत्ति बियाः न्ह्याःवनेत ग्वाहालि याय्गु जुइ । आः हे नं थुगु एकेडेमीइ निम्हेसित छात्रवृत्ति बीधुनागु दु ।’

 

एकेडेमीयात येँय् जक लिमकुंकेगु नविताया बिचाःदु । ‘थुगु एकेडमिं येँयात जक फोकस याःगु मदु । येँय् च्वनाः टेबलटेनिस प्रशिक्षण काय् धाइपिं येँय् नं पिने च्वंपिं कासामितय्त होस्टलया सुविधा बीगु योजनाय् नं बिचाः यानाच्वनागु दु ।’ थ्व बाहेक स्थानीयरुपं टेबलटेपिनसया लोकप्रियता थकायेगु आज्जु नं थुगु एकेडेमीया दुगु खँ न्यंकुसें थुकिया लागिं सकसिगु ग्वाहालि माःगु नवितां धयादि । दक्कले लिपा, टेबलटेनिसया लागिं थुगु एकडेमी माइलस्टोन सावित जुइमा, नविता व वय्कःया परिवारयात जिमिगु नं दुनुगलंनिसेंया भिंतुना ।