अमेरिकां तयातःगु यात्रा प्रतिबन्ध फुकुवा, यात्राय् खोपयात अनिवार्य यायेमज्यूगु डब्लूएचओया धापू
सिल्लागा एकादशी ११४१, फागुन २५ मंगलवाः
अमेरिकां थीथी मुस्लिम देशतय्त तयातःगु यात्रा प्रतिबन्ध चायेकूगु दु । अमेरिकी विदेश विभागं ट्रम्प प्रशासनं तःगु यात्रा प्रतिबन्धया हुनिं भिसा कायेमखंपिं आवेदकपिन्सं हाकनं आवेदन बिइफइगु निर्णय याःगु खः ।
ट्रम्प प्रशासनं १३गू देय्तयेत यात्रा प्रतिबन्ध तःगु खः । यात्रा प्रतिबन्धय् लापिंलय् अप्वः धैथें मुस्लिम देय्त व अफ्रिकी देय् त दु । अमेरिकी राष्ट्रपति जो बाईडनं कार्यभार कायेधुंका न्हापांगु दिंलय् ट्रम्प प्रशासनं तःगु यात्रा प्रतिबन्ध खारेज यानादिगु खः । बाइडनं ट्रम्पया उगु फैसलायात राष्ट्रिय विवेकय् धब्बाया संज्ञा बियादिगु खः ।
अमेरिकी विदेश विभागया तथ्यांक कथं यात्रा प्रतिबन्धया हुनिं थ्यंमथ्यं ४०द्वः मनुतय्त अमेरिका दुहाँवयेत रोक तःगु खः । ट्रम्प प्रशासनं इरान, लिबिया, सोमालिया, सूडान, सिरिया व यमनलिसें १३गू देय्या यात्रुपिनिगु प्रवेशय् प्रतिबन्ध तःगु खः । तर सर्वोच्च अदालतं धाःसा उगु फैसलायात रोक याःगु खः ।
थुखे विश्व स्वास्थ्य संगठनल डब्लुएचओं विदेश यात्राया लागि खोपयात अनिवार्य यायेमज्यूगु धाःगु दु । संगठनया छम्ह अधिकारी डा. माइकल रियानं दक्वः देशय् खोप मथ्यगुलिं व समान रुपं वितरण तकं मजूगुलिं अन्तर्राष्ट्रिय यात्राय् खोपयात अनिवार्य यायेमज्यूगु धाःगु खः ।
संगठनं खोप अनिवार्य यायेगु अव्यवहारिक जुइगु धाःगु दु । गुगुनं खोपं गुलि ईतक्क ज्या याई धैगु तकं पुष्टि मजूगु व अध्ययन जुयाच्वंगु अवस्थाय् थथे अनिवार्य यायेमज्यूगु डा. रियानं धयादिल ।
थुजागु अवस्थाय् खोप काःपिं मनुत सुरक्षित खः कि असुरक्षित धैगु प्रश्न ब्वलंगु वयक्लं धयादिल ।
