एसिड हताः अप्वयेसेंलि एसिड न्यायेत गृहया स्वीकृति कायेमालिगु
चिल्लागा, अष्टमी ११४१, चैत्र २३ गते सोमबाः
एसिड हताःया घटना अप्वयेधुंकाः सरकारं थुकिया न्यायेमीगुलिइ कडाइ याःगु दु । सरकारं आः एसिड न्यायेत गृहया स्वीकृति कायेमाःगु प्रावधान हयेत्यंगु दु ।
एसिड न्यायेमाःपिं उद्योगी÷व्यवसायीं न्यायेमाःगु उद्देश्य व थःत माःगु मात्रा न्ह्यथनाः गृह मन्त्रालयस निवेदन बीमाः । गृह मन्त्रालयं जरुरी सुचं जारी यासें एसिड न्यायेमीगुलिइ कडा प्रावधान तयागु जानकारी ब्यूगु खः ।
कानुन कथं दर्ता वा इजाजत दुगु उद्योगयात औद्योगिक छ्यलाया लागिं एसिड वा मेगु घातक रासायनिक ज्वलं न्यायेमाःसा मन्त्रालयपाखें अनिवार्य अनुमति कायेमाःगु सुचनय् न्ह्यथनातःगु दु ।
थ्वयां न्ह्यः न्ह्याम्हेसिनं नं अःपुक हे एसिड न्यायेमी फयाच्वंगु खः । गुकिं यानाः मिसातय्त एसिड हताः अप्वःगु धासें सरकारं वंगु असोज १२ गते एसिड अले घातक रसायनिक ज्वलं नियन्त्रणसम्बन्धी अध्यादेश जारी यानाः व हे कथं छवाः न्ह्यः नियमावली दयेकूगु खः ।
Categorized in राष्ट्रिय
