राष्ट्रिय महिला लिग फुटबलय् थौं निगू कासा जुइगु
सिल्लाथ्व द्धितिया ११४१, फागुन १, शनिबाः
राष्ट्रिय महिला लिग फुटबलय् थौं निगू कासा जुइत्यंगु दु । एन्फा कम्प्लेक्स सातदोबाटोय् न्हिनय् १२ताः इलय् जुइगु कासाय् एपीएफ व वालिङ नगरपालिका दथुइ धेंधें बल्लाः जुइ ।
अथे हे, न्हिनय् ३ताः इलय् जुइगु मेगु कासाय् विराटनगर महानगरपालिका व चौदण्डीगढी नगरपालिका उदयपुर दथुइ धेंधें बल्लाः जुइ ।
थ्वयां न्ह्यः म्हिगः जूगु कासाय् नेपाल पुलिस क्लबं रौतहटया चन्द्रपुर नगरपालिकायात बुकूगु खः । कासा त्याःगुलिसें पुलिसं स्वंगूगु थासय् दुगु स्याङ्जाया वालिङ नगरपालिकालिसे ल्याः ज्वलिंज्वलय् थ्यंकूगु दु ।
१४ ल्याः मुंकूगु पुलिस गोल अन्तरया लिधंसाय् प्यंगूगु थासय् दु । चन्द्रपुर ६ ल्याः लिसें खुगूगु थासय् दु । शीर्ष थासय् दुगु एपीएफया २४ ल्याः दुसा आर्मी २२ ल्याःलिसें निगूगु थासय् दु ।
Categorized in कासा
