२०७७ माघ ५, सोमबार

मार्केटिङ स्ट्राटिजि दय्केमाल यःमरिया नं

काजी | थिंलागा तृतीया ११४१ सनिवाः १८ गते

दक्कले न्हापां ला यःमरि पुन्हिया भिंतुना । आपालं विशेषता, दर्शन स्वानाच्वंगु साक्क यःमरि नय्गु थुगु नखः झीगु लुखा खरुइ हे थ्यनेधुंकल । आः खापा चाय्काः नखःयात लसकुस यानाः छेँय् दुकाय् जक ल्यं दनि । झीसं यःमरि पुन्हियात लसकुस याय् स्वयां न्ह्यः क्रिश्चियन धर्मावलम्बीतय्सं क्रिस्टमस लसकुस याय्धुंकूगु दु । थन निगू नखः दथुइ गुगु तःधं गुगु चीधं धकाः तुलना याय्त्यनागु धाःसा पक्कां हे मखु । तर लोकप्रियता धाय् वा अपनत्वया विषय छकः लनेमाःगु धाःसा पक्कां खः ।
 
क्रिस्टमस विशुद्ध क्रिश्चियन नखः हे खः । जिसस क्राइस्टया जन्म जूगु दिं कथं क्रिश्चियन धर्मावलम्बीतय्सं क्रिस्टमस हनेगु याइ । यःमरि पुन्हियात धाःसा छगू धर्म विशेषया मिखां स्वय्माःगु मदु । थ्व मानव जीवनलिसे स्वानाच्वंगु नखः खः । अथेखःसां पश्चिमा देशय् जक मखु, क्रिस्टमस नेपालय् नं थौंकन्हय् उलि हे लोकं व्हाना वनाच्वंगु दु । थः क्रिश्चियन मखुसां नं थौंकन्हय्या ल्याय्म्ह पुस्तां क्रिस्टमस तःजिक हे हनेगु यानाच्वंगु दु । क्रिस्टमसया इलय् थनया व्यापारिक केन्द्र व सपिङ मलत लखौं धेबा खर्च यानाः विशेष कथं हे छाय्पीगु ज्या जुल । 
 
 
तर यःमरि पुन्हिकुन्हु व कथंया तामझाम खनेदइ मखु । स्वन्तिया दिंकुन्हु देउसी भैली फ्वंवनीपिं ल्याय्म्हयत्सं फ्वनां नय्गु चलन धकाः त्यःछिंत्यः फ्वं वनीमखु । अथेजुयाः त्यःछिंत्यःया चलन हे तनावनी थें जुइधुंकल । सपिङ मलत लखौं खर्च यानाः झःझः धाय्केगु ला छु, थःगु ध्वाखाय् यःमरि छगः नं ब्वइमखु । थथे छाय् जुयाच्वन धकाः आः छकः बिचाः याय्माः थें च्वं । 
 
मेपिन्त कुंखिनेगु झीगु बानी दु तर थःके दुने दुवालाः आत्मसमीक्षा याय्गु बानी म्ह्वः हे जक दु । यःमरिया मार्केटिङय् जकं झी ल्यूने लाःगु खःला ? यःमरिया मार्केटिङ बांलाक याय्फःसा यःमरि पुन्हि नं उलि हे लोकं व्हाइ जुइ । ततःधंगु मिडियाय् खनेदइगु क्रिस्टमसया लोकप्रियता अप्वयावन । 
 
तर यःमरियात झीसं झीगु मिडियाय् तकं प्रभावकारी रुपं न्ह्यःने यंकेगु मस्वः । अन्तर्राष्ट्रिय स्तरया सेफ कम्पिटिसनय् छम्ह नेपाःमिं यःमरि हे दय्काः फाइनलतक्क वंगु खँ ख्वाउँइ मलाःनि । मार्केटिङ स्ट्राटिजी व मिडिया क्याम्पेनया बांलाःगु योजना दय्केफुसा यःमरि नं उलि हे लोकं व्हाइगु निश्चित खः । आः झीसं थुखेपाखे बिचाः यानाः न्ह्याःवनेगु खः ला ?