नेतृ अष्टलक्ष्मी शाक्य प्रहरीया कजय्, ७७म्ह कार्यकर्तापिन्त नं ज्वन
पोहेलागा सप्तमी ११४१, माघ २२ बिहीवाः
आमहड्ताल सफल यायेत न्ह्यज्यानाच्वंम्ह नेकपा दाहाल–नेपाल पुचःया दुजः अष्टलक्ष्मी शाक्यलिसें ७७ नेता लिसें कार्यकर्तापिन्त प्रहरीं थःगु कजय् काःगु दु ।
कलंकीपाखें अष्टलक्ष्मी शाक्ययात प्रहरी कजय् काःगु खः । आः वय्कयात महाराजगञ्जया महानगरीय प्रहरी शिक्षालय हया तयातःगु धाःगु दु ।
थ्वलिसें चाबहिल, बागबजाः सामाखुसीपाखें नं नेता व कार्यकर्ता ज्वंगु नेकपा न्ह्यथंगु दु । उमिसं सतकय् वयेवनिगुलिइ अवरोध याःगु धासें उमित ज्वनागु प्रहरी धाःगु दु ।
महानगरीय प्रहरी कार्यालय, लानीपुखुया मू हरिबहादुर पालया कथं येँ नं ७६म्ह व ख्वपं १ आन्दोलनकारी ज्वनागु व उमिते लिकसंया प्रहरी ज्याकूथिइ तयातःगु धाःगु दु ।
गृह मन्त्रालयं बुधबाः हे छगू सूचं जारी याना सतक गुगुनं कथंया अवरोध वा तोडफोड थुं जाःगु ज्या याःपिन्त ज्वनेगु धाःगु खः । प्रहरीं सुथय् २ताः ईलंनिसें हे सादा पोसाकया प्रहरीपिन्त खटेयाःगु खः ।
