वाग्मती प्रदेशया मुख्यमन्त्री डोरमणि पौडेलविरुद्ध प्रदेश सभाय् दर्ता जूगु अविश्वासया प्रस्ताव सदनय् पेस जूगु दु ।

थौं शुक्रवाः च्वंगु प्रदेश सभाया बैठकय् सभामुख सानुकुमार श्रेष्ठं सांसद अरुण नेपालयात मुख्यमन्त्री पौडेल विरुद्धया अविश्वास प्रस्ताव सदनय् पेस यायेत अनुमति बिःगु दु।

आः प्रदेश सभाय् वइगु १९ गते २ बजे च्वनिइगु बैठकं अविश्वास प्रस्तावय् छलफल जुइ । प्रदेश सभाया सभामुख श्रेष्ठं मेगु बैठकय् सहलह यायेगु कथं थौं शुक्रवाःया लागि बैठक क्वचाःगु जानकारी बिःगु दु। वःगु पुस १० गते सत्तारुढ नेकपा प्रचण्ड–नेपाल समूहया ४५ म्ह सांसदपिन्स ल्हाचिं तया अविश्वासया प्रस्ताव प्रदेश सभाय् दर्ता याःगु खः ।

प्रदेश सभाय् ११० म्ह सदस्य दुगुलि ५६ म्ह सदस्य दतकि बहुमत थ्यःनि। प्रदेश सभाय् कांग्रेसया २२म्ह, विवेकशील साझाया स्वम्ह, राप्रपाया निम्ह, नेपाल मजदुर किसान पार्टीया निम्ह व छम्ह स्वतन्त्र सांसद दु।

Categorized in राजनीति