निक्वःगु वल्र्ड बज्राचार्य अवार्ड वइगु पुस २ गते जुइगु जूगु दु । वइगु पुस २ गते येँया प्रज्ञा कमलादीस्थित प्रज्ञा भवनया हलय् अवार्डया निगूगु संस्करण जुइत्यंगु खः ।

विशेष यानाः शैक्षिक क्षेत्रय् केन्द्रीत जुयाः बज्राचार्य समुदाय दुने बियावःगु अवार्डय् थुगुसी सच्छिम्ह स्वयां अप्वः सम्मानित जुइगु ज्याझ्वः कजि शैलेन्द्रमान बज्राचार्यं धयादीगु दु ।

हलिंन्यंक च्वनावःपिं न्यासः स्वयां अप्वःसिनं अवार्डया नितिं थःगु नां दर्ता याकूगु खः ।

अवार्ड ज्याझ्वलय् एस.ई.ई. निसें स्नातकोत्तर तगिंतक्क हरेक संकायया हरेक विधाय् उच्च ल्याः हयाः उत्तीर्ण जूपिन्त बज्राचार्य अवार्डपाखें सम्मान याइ ।

अथे हे, पि. एचडी. पूवंकूपिंलिसें नेपालभाषा व बुद्धिष्ट विषय कयाः ब्वंपिं हरेक विद्यार्थीतय्त अवार्ड लःल्हाइगु जूगु दु । बौद्ध सम्पदा व शिक्षाप्रति युवा पुस्ताय् जागरण हयेगु आज्जुलिसें अवार्ड ज्याझ्वः यानावयागु ज्याझ्वः कजि बज्राचार्यं धयादिल ।

‘झीगु पहिचान धइगु हे झीगु मौलिक सम्पदा व परम्परा खः । युवा पुस्ताय् थज्याःगु विषयप्रति चेतना म्ह्वः जुयावंगु अवस्था दु । अयजुयाः युवा पुस्ता दथुइ नं झीगु पहिचान, धर्म, परम्पराया संरक्षण सम्वद्र्धनय् च्यूताः अप्वय्मा धकाः थुगु अवार्ड ज्याझ्वः यानावयागु खः’ बज्राचार्यया धापू खः ।

नापं अवार्डया निक्वःगु संस्करणय् नं लाइफटाइम अचिभमेन्ट अवार्डलिसें बौद्ध क्षेत्रय् विशिष्ट योगदान बियावःम्ह व्यक्तियात बीगु विशेष सम्मानयात निरन्तरता बीगु ज्याझ्वः कजि बज्राचार्यं धयादिल ।

बज्राचार्यया कथं थुगुसी बौद्ध विद्वानलिसें भाषा जवाः फणिन्द्ररत्न बज्राचार्ययात लाइफटाइम अचिभमेन्ट अवार्डपाखें सम्मानित यायेत्यंगु दु ।

अथे हे, बौद्ध सम्पदा संरक्षण, जिर्णोद्धारलिसें पुनर्निर्माण व बुद्धया शिक्षा प्रचार प्रसारय् विशिष्ट योगदान ब्यूगु धासें येँ महानगरपालिकाया पूर्व मेयर विद्यासुन्दर शाक्ययात विशेष सम्मान बीत्यंगु दु ।

लाइफ टाइम अचिभमेन्ट अवार्ड बज्राचार्य समुदाय दुनेयापिन्त हे बीगु यानाच्वंगु दुसा विशेष सम्मान धाःसा बौद्ध क्षेत्रय् योगदान बियावःपिं गैर बज्राचार्ययात नं बीफुगु खँ ग्वसाः खलकं धाःगु दु ।

थुगु ज्याझ्वः शैक्षिक क्षेत्रय् केन्द्रीत जुयाच्वंगु व लिपा वनाः मेमेगु विभिन्न क्षेत्रय् केन्द्रीत जुयाः अलग अलग क्षेत्रय् योगदान बियावःपिं बज्राचार्यतय्त सम्मान यायेत अलग अलग ज्याझ्वः यानावनेगु ग्वसाः दुगु नं ग्वसाः खलकं धाःगु दु ।

‘आः झी शैक्षिक क्षेत्रय् केन्द्रीत जुयागु दु । लिपा वनाः बज्राचार्य स्पोर्ट्स अवार्ड, बज्राचार्य बिजनेस अवार्ड आदि नं यानावनेगु झीगु योजना दु’ ग्वसाः खलः बज्राचार्य क्लबया नायः सर्जु बज्राचार्यं धयादिल ।

निदँय् छकः यायेगु ग्वसाः कथं सन् २०१९ य् न्ह्याःगु थुगु अवार्डया निक्वःगु संस्करण स्वदँ लिपा जुइत्यंगु खः । दथुइ कोभिड महामारीया हुनिं इलय् ज्याझ्वः यायेमफूगु ग्वसाः खलकं जानकारी ब्यूगु दु ।

Categorized in राष्ट्रिय