वाणिज्य बैंकतय् लबः म्ह्वः जूल
राम डंगोल | पोहेलागा पारु११४१, माघ १६ शुक्रवाः
थगुनेया तुलनाय् थुगुसी १७ वाणिज्य बैंकतय् लबः म्ह्वः जूगु दु । थुगु आर्थिक दँया न्हापांगु खुलाय् १७ वाणिज्य बैंकतय् लबः थगुनेया थ्व हे ईया तुलनाय् कुहांवःगु खः ।
झिगू बैंकया धाःसा लबः अप्वःगु खनेदत । मर्ज यानाः थुगुसी मंकाः कारोबारया विवरण क्यंबलय् छुं बैंकया लबः अप्वःगु खनेदुगु खः ।
समग्रय् २७ वाणिज्य बैंकं साउननिसें पुस मसान्ततक्क ३१ अर्ब ७ क्वःति तका खुद नाफा कमे याःगु दु । थगुनेया थुगु इलय् ३२ अर्ब २० क्वःति नाफा कमे जूगु खः । कोरोना लिच्वलं आर्थिक ज्याखँ लिकुंबलय् लबः म्ह्वः जूगु बैंकर्स एशोशिएसनं न्ह्यथंगु दु । लगानी यायेबहःगु धेबा थातं लाःबलय् बैंकया लागत थहां वनाः लबलय् लिच्वः लाःगु एशोशिएसनं न्ह्यथंगु द ।
बैंकतय् स्प्रेड दर कुहांवंबलय् लबलय् लिच्वः लाःगु बैंकतय् ठहर दु । आः थज्याःगु दर औसतय् ४ प्रतिशत दु, जबकि थगुनेया थुगु इलय् ५ प्रतिशत दुगु खः । बैंकतय्सं बचतकर्तायात बीगु ब्याज व ऋणीपाखें वइगु ब्याजया औसत दर हे स्प्रेड दर खः । थुगु दर हे बैंकतय् आम्दानी खः । थगुने पुस मसान्ततक्क राष्ट्रिय वाणिज्यं दक्कले आपाः २ अर्ब २० क्वःति खुद नाफा कमे याःगु खः ।
थुगुसी वया नाफा १ अर्ब ७५ क्वःतिइ लिकुंगु दु । ग्लोबल आइएमईं खुलाय् दक्कले यक्व नाफा कमे याःगु दु । तत्कालीन जनता बैंकलिसे छधी जूगुलिं ग्लोबल आइएमईया लबः उच्चदरं थहांवंगु खनेदु ।
अथे हे, मेगा, प्राइम कमर्सियल, एनएमबी व कुमारीया नाफा मर्जर एक्वीजिसनया हे हुनिं उच्चदरं थहांवंगु खनेदु । प्रभु, सिटिजन्स, नेपाल बंगलादेशं धाःसा वास्तविक रूपं हे लबः अप्वयेकूगु दु । सनराइज व एनआइसी एसियाया लबः नं सामान्य अप्वःगु दु ।
