वार्सिलोना कोपा डेल रेया सेमिफाइनलया थाय् पक्का
पोहेलागा सप्तमी ११४१, माघ २२ बिहीवाः
एन्टोइन ग्रिजमन व जोर्डी अल्वाया निगू निगू गोलया ग्वहालिइ बार्सिलोनां निगू गोलं लिउने लाःगु स्थितियात भिंका कोपा डेल रेया सेमिफाइनलय् थाय् पक्का याःगु दु ।
बार्सिलोनां घरेलु टोली ग्रानडायात ५–३गूया गोलया लिच्वः पिकासें कासा त्याका लिपांगु ४गूलिइ थाय् पक्का याःगु खः ।
बार्सिलोना त्यागुलिइ थप छगू गोल फ्रान्की डि जोङया नामय् जुल । ग्रानडाया केनेडी, रोबर्टाे सोल्डाडो व फेडे भिकों गोल याःगु खः । ग्रानडाय् वंगु चान्हय् जूगु कासाय् घरेलु टोलीं कासाया ३३गूगु मिनेटय् केनेडीया गोलपाखें कासाय् अग्रता काःगु खः । ४७गूगु मिनेटय् एन्जल मोन्टोरोया पासय् रोबर्टाे सोल्डाडों गोल याना ग्रानडाया गोल ल्याः निदुगं याःगु खः । तर, लिपांगु इलय् बार्सिलोनां निगू गा ेल याना कासायात अतिरित्त इलय् थ्यंकल ।
८८गूगु मिनेटय् एन्टोइन ग्रिजमनं कप्तान लियोनेल मेस्सीया पासय् गोल याना बार्सिलोनायात कासाय् लितहयेगु छुमां क्यना ।
इन्ज्युरी ईया थप जूगु निगूगु मिनेटय् जोर्डी अल्वाले ग्रिजमनया पासय् गोल याना बार्सिलोनायात २गू–२गू गोलया ज्वलिन्ज्वःलय् थ्यंकुगु खः ।
कासाया सच्छिगू मिनेटय् ग्रिजमनं गोल याना बार्सिलोनायात ३–२गू गोल अन्तरं न्ह्योने लाकल ।
तर सच्छि व ३गूगु मिनेटय् फेडे भिकों पेनाल्टीइ गोल याना हाकनं कासायात ३गू–३गू गोलया ज्वलिन्ज्वःलय् हल । सच्छि व ८गूगु मिनेटय् फ्रान्की डि जोङं व सच्छिव १३गूगु मिनेटय् जोर्डी अल्वां गोल याना बार्सिलोनायात ५–३गू गोल अन्तरं कासा त्याका लिपांगु ४गूया यात्रा क्वजिउगु खः ।
