भागरथी हत्या प्रकरणय् प्रहरीया अनुसन्धान जारी, दोषीयात मज्वंतले सीम्ह मकायेगु छेँजःया धिनां
पोहेलागा द्धादशी ११४१, माघ २६ सोमवाः
बैतडीया दोगडाकेदार गाँँपालिकाया १७दँया भागरथी भट्टयात स्यागुया अनुसन्धान तच्कवं न्ह्यागु प्रहरीं न्ह्यथंगु दु । अनुसन्धानया नितिं प्रहरीं फुक्क जनशक्ति परिचालन याःगु धाःगु दु ।
घटनाया विवरण थुइकेत सुदूरपश्चिम प्रदेश प्रहरी प्रमुख उत्तमराज सुवेदी तकं म्हिगः बैतडी थ्यंकादीगु खः । तालिम चूलाम्ह खिचां भागरथीयात स्यागु जङ्गल क्षेत्र पूवंक हे ‘सर्च’ याःगु प्रहरीं धाःगु दु ।
प्रहरीं भागरथीया थःथितिपिंलिसे न्यनेकने याःगु नापं शङ्कास्पद मनूयात निगरानी अप्वयेका सूक्ष्म अध्ययन जुयाच्वंगु जिल्ला प्रहरी ज्याकु बैतडीं न्ह्यथंगु दु ।
थ्वयान्ह्यः सुदूरपश्चिम प्रदेश प्रहरी ज्याकुया वरिष्ठ उपरीक्षक जनकराज पाण्डे नेतृत्वया अनुसन्धान टोली घटना लागा थ्यंका अध्ययन यानाच्वंगु दु ।
थुकिया नापं घटनाया अनुसन्धानया नितिं केन्द्रीय अनुसन्धान ब्यूरोया डीएसपी पञ्चकुमार बाँखु नापंया प्राविधिक टिम परिचालन जूगु दु ।
किशोरीं छ्यगु मोबाइल नं घटना लागाय् हे लूगुलिं मोबाइलपाखें आपालं खँ लुइगु प्रहरीया दाबी दु । स्यागुया विरोधय् बैतडीइ शैक्षिक हड्ताल याःगु दु ।
स्यागुलिइ दुथ्यापिन्त कारबाहीया माग यासें ब्वज्या जूगु दु । दोषीयात ज्वनेज्या मजूतलेतक्क सीम्ह लःल्हाना मकायेगु छेँजःलं धिनां काःगु दु ।
