भागरथीलिसे अभियुक्तया डीएनए ज्वलात
चिल्लाथ्व त्रयादशी ११४१, चैत्र १३ गते शुक्रबाः
बैतडीया किशोरी भागरथी भट्टया हत्याकाण्डया आरोपी किशोरं हे स्यागु प्रहरीं दावी याःगु दु । म्हिगः वःगु रिपोर्टय् भागरथीया भजाइनल स्वाबलिसे अभियुक्तया डीएनए ज्वलाःगु प्रहरीं न्ह्यथंगु दु ।
केन्द्रीय विधि विज्ञान प्रयोगशालाय् याःगु परीक्षणय् अभियुक्त १६ दँया दिनेश भट्टया डिएनए व भागरथीया भजाइनल स्वाब ज्वलाःगु जिल्ला प्रहरी ज्याकु वैतडीया प्रहरी प्रमुख डीएसपी नारायणप्रसाद अधिकारीं जानकारी बियादील ।
दिनेशयात पुर्पक्षया नितिं बाल सुधार गृह डोटीइ तयातःगु दु । थ्वयान्ह्यः दिनेशं सुधारगृहय् दूगु इलय् थःपिन्सं बलात्कार व हत्या मयानाःगु जिकिर याःगु खः । तर भागरथीलिसे दिनेशया डीएनए ज्वलाय् धुंका दिनेश हे उगु घटनाया मू दोषी पुष्टि जूगु प्रहरीया दावी दु ।
वंगु माघ २१ गते ब्वनेकु वंम्ह भागरथी सनिलय् छेँय् लिहाँमवयेधुंका खोजतलास जूबलय् माघ २२ गते स्थानीय लवलेक जंगलय् विभत्स व निर्वस्त्र अवस्थाय् सीम्ह लूगु खः ।
