छायाँ सेन्टर प्रकरणय् न्हिया न्हिं न्हुगु खँ पिहावया च्वंगु दु । छुं दिंं न्ह्य छायाँय् ज्या याइपि कर्मचारीपिन्स छायाँ सेन्टर दुगु थाय् कमलपूखु पुर्नस्थापना यायेमाः धका जुयाच्वम्ह अभियन्ता भागवत नरसिंह प्रधानयात धम्के यायेगु ज्या जुगु दु।

थ्व स्वया न्ह्यः अभियन्ता प्रधानं शान्तिपुर्वक म्वायेगु अधिकार हनन जुगु धाःसे राष्ट्रिय मानव अधिकार आयोग व शान्ति सुरक्षाया माग यासे जिल्ला प्रशासन कार्यालय काठमाडौंय् निवेदन बिःगु खः। आः हाकनं अभियन्ता प्रधानयात छायाँया कर्मचारीपिन्स ंधम्के यापि व प्रधान दथुइ सहमति जुगु दु। महानगरीय प्रहरी वृत्त स्वयम्भुइ निगु पक्ष उपस्थितइ छम्हेसिया मेम्हेसित पंगः मथनेइगु धका मिलापत्र याःगु दु ।

अभियन्ता प्रधानया छेँय् वना पत्र बिउ वम्ह रामबहादुर श्रेष्ठ, युनिट्राभ केन्द्रीय कमिटीया अध्यक्ष सुमन पराजुलि लगायतपिन्स  आवनिसे प्रधानया छेँय् मवनेगु व अज्यागु किसिमया पत्र मबिइगु व, धम्की बिइगु ज्या मयायेगु धका सहमति जुगु दु। अथेहे अभियन्ता प्रधानयात अदालतय् विचाराधीन मुद्दाय् अदालतपाखे फैसला मवतले छायाँया कर्मचारीपिन्त असर जुइगु छु न गतिविधि मयायेगु सहमति जुगु दु।

प्रहरी वृत्तय् अभियन्तापि तधःगु ल्याखं भेला जुगु खः । शुरुया निघौं तक निगु पुचः दथुइ वादविवाद तक जुगु खः। लिपा निगु पुचः दथुइ छगु पक्षं मेगु पक्षयात वाधा, अवरोध, धम्की बिइगु गतिविधि मयोगु सहमति जुगु खः।छु दिं न्ह्य छायाँ सेन्टरया मजदुरपिन्स सरोकार सम्वन्धय् धाःसे छायाँँया छु कर्मचारीपिन्स अभियन्ता प्रधानया छेँय् वना छायाँ सेन्टरविरुद्धया गतिविधि बन्द यायेत पत्र बिःगु खः।

Categorized in राष्ट्रिय