बाइडेनया आज्जु सच्छिन्हू दुने २०गू क्वःति नागरिकयात कोरोनाया खोप बिइगु
चिल्लाथ्व त्रयादशी ११४१, चैत्र १३ गते शुक्रबाः
अमेरिकी राष्ट्रपति जो बाइडेनं थःगु आज्जु राष्ट्रपतिया हैसियतं ज्या यानागु न्हापांगु सच्छिन्हू दिंलय् २०गू क्वःति नागरिकयात कोरोनाया खोप बिइगु जूगु धाःगु दु ।
राष्ट्रपति जुइधुंका न्हापांखुसिइ ग्वसाःग्वःगु आधिकारिक पत्रकार सम्मेलनय् राष्ट्रपति बाइडेनं थुकथं न्ववानादीगु खः । थ्व आज्जु महत्वाकांक्षी जूसा नं थुकिइ थःपिं सुथांलाइगु वाइदेनया भलसा दु ।
मेगु देय्या तुलनाय् अमेरिकां आः याःगु कुतः सकारात्मक पहःलं न्ह्यागु धासें खोप अभियानय् नं थःपिं सुथांलाइगु बाइडेनं भलसा प्वंकुगु दु ।
थ्वहे दथुइ राष्ट्रपति जो वाइडेनं निगूगु कार्यकालया नितिं थःपिन्सं उम्मेदवारी बिइगु धाःगु दु । पत्रकार सम्मेलनय् बाइडेनं सन् २०२४य् नं उम्मेदवारी बिइगु धाःगु खः ।
७८ दँया वाइडेन अमेरिकाया इतिहासय् हे राष्ट्रपति जूम्ह दक्वःलय् ज्याथाम्ह मनू खः व वयेकल ४दँया कार्यकाल कःघाइगु ताकं याःगु दु ।
Categorized in अन्तर्राष्ट्रिय
