२०८० चैत्र १६, शुक्रबार

बाइडेनं न्ह्यब्वगु कोभिड प्याकेज अमेरिकी कंग्रेसया क्वयेय्या सदनं पारित

सिल्लागा त्रयोदशी ११४१, फागुन २७ विहीबाः

अमेरिकी कंग्रेसया क्वयेय्या सदनं राष्ट्रपति जो बाइडनं न्ह्यब्वगु १९गू खर्ब डलर ज्वलिन्ज्वःया कोभिड राहत प्याकेज पारित याःगु दु ।
 
आः तक्क अमेरिकां कोभिड महामारीपाखें पुनरुत्थानय् ५०गू खर्ब डलर खर्च जुइधुंकुगु धाःगु दु । राष्ट्रपति बाइडनया १९गु खर्ब डलरया प्याकेजं कोभिडया लिच्वः फयाच्वंपिं अमेरिकीतय्त राहत बिइगु धाःगु दु ।
 
बुधवाः क्वयेय्या सदन प्रतिनिधिसभां थुकियात पार्टीगत बहुमतं पारित याःगु खः । मतदान जूबलय् छम्ह बाहेक फुक्क डेमोक्राट सांसदं थुकिया समर्थन याःगु खः ।
 
राहातयात रिपब्लिकन दलया सांसदपिन्सं धाःसा अस्वीकार याःगु खः । थ्वयान्ह्यः च्वयेय्या सदनं नं थ्व प्याकेजयात पारित याःगु खः । आः थुकियात राष्ट्रपतिं ल्हाचिं तयेधुंका लागू जुइ ।
 
ह्वाइट हाउसया कथं थुकिइ शुक्रबाः हे राष्ट्रपति बाइडनं ल्हाचिं तयादी । राष्ट्रपति बाइडनं थुगु प्याकेजं देय्या मेरुदण्ड– आवश्यक सेवाया कर्मचारी, देय् निर्माण याइपिं श्रमिक अले थुगु देय् न्ह्याकिपिं आम मनूतयेत महामारीया प्रभावलिसे ल्वायेत ग्वहालि जुइगु धाःगु दु ।
 
Categorized in अन्तर्राष्ट्रिय