बाइडन जुल अमेरिकाया ४६म्हम्ह राष्ट्रपति
डंगोल | पोहेलाथ्व अष्टमी ११४१, माघ ८ विहीबाः
जो बाइडनं अमेरिकाया ४६म्हम्ह राष्ट्रपतिया रूपय् पद शपथ काःगु दु । वय्कयात सर्वोच्च अदालतया न्यायाधीश जन रोबट्र्सं शपथ कायेकूगु खः ।
अथेहे कमला ह्यारिसं जो बाइडननाप उपराष्ट्रपति पदया सपथ कयादीगु दु । वय्क अमेरिकाया उपराष्ट्रपति पदय् निर्वाचित जुयादीम्ह न्हापांम्ह मिसा खः ।
शपथ ग्रहणया ज्याझ्वःनाप राष्ट्रपति बाइडेनं थःगु न्हापांगु टिप्पणी सार्वजनिक यासें थःगु नेतृत्व बहाल जूगुनाप प्रजातन्त्रं त्याकूगु प्रतिक्रिया बियादिल ।
प्रजातन्त्र अतिकं बहुमूल्य जूगु उल्लेख यानाः आवलिं प्रजातन्त्रय् वइगु हाथ्यायात फयाः न्ह्यज्यायेगु बचं बियादिल ।
विनाशकारी महामारी, व्यापक रूपय् अप्वःगु बेरोजगारी, जोखिमय् लाःगु लकस, जातीय समानतासम्बन्धी न्यायया नितिं जुयाच्वंगु माग व हाकन तच्वःगु राजनीतिक अतिवाद बाइडेनया मूमू हाथ्या जूगु उल्लेख यानादीगु दु । थुपिं हाथ्या फयेत राष्ट्रपतिया रुपय् बाइडेनं राष्ट्रिय एकताय् बः बीमाःगु धयादिल ।
थ्वहेदथुइ निवर्तमान राष्ट्रपति डोनाल्ड ट्रम्पं बाइडेनया शपथ ग्रहण समारोहलय् ब्वति मकाल । थः उत्तराधिकारीया शपथ ग्रहण समारोहलय् ब्वति मकाःम्ह ट्रम्प प्यम्हम्ह अमेरिकी राष्ट्रपति जूगु धागु दु ।
तर ट्रम्पया उपराष्ट्रपति माइक पेन्स धाःसा ज्याझ्वलय् दु । सपथ ग्रहण ज्याझ्वलय् पूर्व राष्ट्रपति बाराक ओबामा, मिसेल ओबामा, जर्ज डब्ल्यू बुश, लोरा बुश, बिल व हिलारी क्लिन्टननापंयापिनिगु ब्वति दुगु खः ।
अथेहे अमेरिकी राष्ट्रपति जो बाइडनं थःगु कार्यकालया न्हापांगु दिं थीथी कार्यकारी आदेश जारी यानाः थःगु प्रशासनया प्राथमिकता प्रस्ट यानादीगु दु ।
कार्यभार कःघागु छुं ईदुने वय्कलं जारी याःगु कार्यकारी आदेशमध्ये गुलिख्य ट्रम्प प्रशासनया नीति अःखः दु ।
थ्वहेदथुइ वय्कलं कोरोना भाइरस महामारीया संकट सम्बोधनय् संघीय कारबाही तच्वयेकेगुनिसें जलवायु परिवर्तन, आप्रवासन व जातिय सम्बन्धबारेया नीति उल्टे यानादीगु दु ।
ट्रम्पं लागु याःगु मुस्लिम प्रतिबन्ध अन्तर्गतया प्रतिबन्ध फुकुवा यानाः मेक्सिकोया सिमानाय् पःखाः दनेगु ज्या दिकेगु धयादीगु दु ।
Categorized in अन्तर्राष्ट्रिय
