मे महिना दुने दक्वं वयस्कपिन्त कोभिड खोप बीकेगु राष्ट्रपति बाइडेनया प्रतिवद्धता
सिल्लागा चःह्रे ११४१, फागुन २८ शुक्रवाः
अमेरिकी राष्ट्रपति जो बाइडनं मे महिना दुने दक्वं वयस्क अमेरिकीतय्त खोप बीकेत गाइगु कथं आपूर्ति व्यवस्था ताःलाकागु धयादीगु दु ।
राष्ट्रपतिइ निर्वाचित जुइधुंकाः न्हापांगु टेलिभिजन सम्बोधन यासें वय्कलं मे १ दुने दक्वं वयस्क अमेरिकीयात खोप बीके योग्य दयेकेत राज्य अले स्थानीय निकायतय्त आदेश बीगु धयादिल ।
सकसितं पाः वयेधुंकाः खोप कायेत नं वय्कलं आह्वान यानादिल । दच्छिया सामूहिक क्षति व बलिदान धुंकाः आः देशय् बांलाःगु दिं वःगु बाइडेनया धापू दु ।
जुलाई ४ या अमेरिकी स्वतन्त्रा दिवसया इलय् चिचीधंगु भेला यायेफइगु सम्भावना अप्वःगु बाइडेनं धयादिल । कोरोनाभाइरसं अमेरिकाय् ५ लख स्वयां आपाः सीधुंकूगु दु ।
थ्वयां न्ह्यः, राष्ट्रपति बाइडनं १९ खर्ब डलरया कोभिड राहत प्याकेजमार्फत् अमेरिकाया मेरुदण्ड पुनर्निर्माण जुइगु धयादीगु खः । उगु प्याकेज सम्बन्धि विधेयक म्हिगः अमेरिकी संसदं पारित जूगु खः ।
विधेयकय् राष्ट्रपति बाइडेनं ल्हाःचिं तयेधुंकाः विधेयकबारे जानकारी बीत सम्बोधन यानादीगु खः ।
Categorized in अन्तर्राष्ट्रिय
