विमस्टेकया १७क्वःगु परराष्ट्र मन्त्रीस्तरीय मुँज्या अप्रिल १य् जुइगु
लहनान्यूज | सिल्लागा त्रयोदशी ११४१, फागुन २७ विहीबाः
वहुपक्षीय प्राविधिक लिसें आर्थिक ग्वहालिया नितिं बंगालया खाडी देय्या कुतः (विमस्टेक) या १७क्वःगु परराष्ट्र मन्त्रीस्तरीय मुँज्या अप्रिल १ य् जुइत्यंगु दु ।
श्रीलंकाया विदेश मन्त्रालयं वइगु अप्रिल १ य् १७ क्वःगु परराष्ट्र मन्त्रीस्तरीय भर्चुअल मुँज्याया नितिं फुक्क दुजः देय्यात निमन्त्रणा छ्वगु न्ह्यथंगु दु । श्रीलंका विमस्टेकया आःया नायः देय् खः ।
परराष्ट्रमन्त्रीस्तरीय मुँज्या न्ह्यः मार्च ३१ य् उच्च अधिकारीतय् मुँज्या जुइ । उगु मुँज्यां शिखर सम्मेलनया मिति क्वजिइगु धाःगु दु ।
श्रीलंकां थुगुसिइ हे जुइगु शिखर सम्मेलनय् न्ह्यब्वइगु दस्तावेजया खँय् सहलह यायेत विदेश मन्त्रीस्तरीय मुँज्याया ग्वसाःग्वये त्यनागु धाःगु दु । सम्मेलन भर्चुअल माध्यमं जुइ कि भौतिक कथं धइगुलिइ यकिन मजूनि ।
थुगु विषयस परराष्ट्रमन्त्रीपिन्सं थःथःवय् परामर्श याइगु जूगु दु । हरेक निदँ दुने जुइमाःगु सम्मेलन सन् २०२० य् जुइमाःगु खः तर कोरोना महामारीया हुनिं जुइ मफुत । सन् २०१८ य् विमस्टेकया ४क्वःगु शिखर सम्मेलन येँय् जूगु खः ।
कोरोना महामारीया लिच्वः म्हो जुयावनेधुंका थुगुसिइ अन्त्यपाखे शिखर सम्मेलन यायेगु याना प्रक्रिया न्ह्याकुगु खः । विमस्टेकय् बंगलादेश, भुटान, भारत, म्यानमार, नेपाल, श्रीलंका व थाइल्याण्ड दुजः कथं दु ।
