बेवारिसे शव च्याका चर्चाय् वम्ह सपना रोका मगरयात धम्की बिःगु आरोपय् ज्वनातःम्ह विनयजंग बस्नेतविरुद्ध साइबर अपराधया मुद्दाय् कारबाही प्रक्रिया न्ह्यने यकूगु दु ।

विद्युतीय माध्यमयात छ्यला सपनाया गोप्य किपा तयातःम्ह बस्नेतविरुद्ध विद्युतीय कारोबार ऐन कथं कारबाही प्रक्रिया न्ह्यने यकूगु दु । येँया प्रहरी परिसर, टेकुया छम्ह अनुसन्धान अधिकृतया कथं विनयजंगया मोबाइलय् सपनाया छु गोप्य किपा लूगु दु। अय्न, उगु किपा गय् याना वल धइगु विषय अनुसन्धान जुयाच्वंगु दु।

उकिया लागि प्रहरीं विनयया मोबाइल प्रहरी प्रधान कार्यालय, नक्सालय् दुगु डिजिटल फरेन्सिक ल्याबय् छ्वःगु दु । येँया प्रहरी प्रमुख अशोक सिंह न उगु घटनाबारे अनुसन्धान जारी जुया च्वंगु दु धका धाःगु दु । बस्नेतं छु युट्युब च्यालनय अन्तर्वार्ता बिया ‘जिगु मोबाइलय् सपनाया नांगा किपा दु, सार्वजनिक यानाबिइ’ धका धम्की बिया वयाच्वंगु दु ।

बस्नेत व सपना छम्ह मेम्हेसित अबु व म्ह्याय् धका म्हसिका वयाच्वंगु खः।

Categorized in अपराध