महासचिव विप्लव येँ थ्यनः, न्हिनय् २ताः ईलय् सार्वजनिक जुइगु
लहनान्यूज | सिल्लागा सप्तमी ११४१, फागुन २१ शुक्रबाः
सरकारलिसे ३ता खँया सहमति याना शान्तिपूर्ण राजनीतिइ वःगु विप्लव नेतृत्वया माओवादीया महासचिव नेत्रविक्रम चन्द (विप्लव) थौं येँय् सार्वजनिक जुयादीत्यंगु दु ।
प्रहरीं स्कर्टिङ याना महासचिव चन्दयात वालुवाटार थ्यंकूगु दु । थौं राष्ट्रिय सभागृहस न्हिने २ताः इलय् विप्लव सार्वजनिक जुइत्यंगु दु ।
सभागृहस ग्वसाःग्वःइगु समारोहयात प्रधानमन्त्री केपी शर्मा ओली व विप्लवं सम्बोधन यानादीगु ज्याझ्व दु ।
उगु हे समारोहस प्रधानमन्त्री ओली व महासचिव विप्लवं ३ता खँया सहमति पौखय् ल्हाचिं तयादी ।
सरकार व विप्लव पुचः दथुइ म्हिगःया वार्तालिपा सार्वजनिक जूगु प्रेस नोटय् ३ता खँया सहमित जूगु उल्लेख जूगु दु । उगु सहमतियात म्हिगः हे च्वंगु मन्त्रिपरिषद मुँज्यां अनुमोदन यायेधुंकुगु दु ।
प्रेस नोटय् विप्लव पुचः शान्तिपूर्ण राजनीतिइ वइगु, सरकारं प्रतिबन्ध चिइकिगु, बन्दीयात त्वःतिगु व मुद्दा खारेज यायेगु उल्लेख जूसा नं विप्लव पुचःलिसे दूगु ल्वाभःया व्यवस्थापनया विषय उल्लेख जूगु मदु ।
संसदवादी दलतयेपाखें जनक्रान्ति सुथांमलाइगु धका बिस्कं हे पार्टी गठन याना थःपिनि ज्यापहः न्ह्याकुगु थुगु पुचःलं हत्या, हिंसायात नालाकाःगु धका सरकारं २०७५ फागुन २८ गते प्रतिबन्ध तःगु खः ।
वयांलिपा विप्लव सार्वजनिक ज्याझ्वस खनादीगु मदुनि ।
