नेपालय् खनेदत बर्डफ्लु
पोहेलागा तृतीया ११४१, माघ १८ आइतवाः
पशुपंक्षीतय्त लाइगु ल्वय् बर्डफ्लु नेपालय् खनेदयावःगु दु । येँया तारकेश्वर नगरपालिकाया वडा नम्बर ७ या किसानं लहितःगु टर्की व हेँय्ले बर्डफ्लू पुष्टि जूगु पशु सेवा विभागं न्ह्यथंगदु ।
विभागं छगू विज्ञप्ती जारी याना येँय् बर्डफ्लु खनेदूगु धासें कजय्काये पशुपन्छीे ओसारपसारय् ध्यान बिइत इनाप याःगु दु । विभागं केन्द्रिय पशुपन्छी रोग अन्वेषण प्रयोगशालाय् याःगु रियल टाइम परीक्षण याबलय् बर्डफ्लू खनेदूगु पुष्टि जूगु खः । बर्डफ्लू पुष्टि जुसें फार्म लिसें लिकसंया थासय् च्वंगु १८ सय ५६म्ह हेँय्, ६ सय २२ म्ह बट्टाई, ३२म्ह खा वा, २५म्ह ा टर्की अले ५ सय ४२ खेँय् व ७५ केजी दाना नष्ट यानागु विभागं जानकारी बिल ।
ल्वचं मन्यंकेगु हुनिं बर्ड फ्लू खनेदूगु थासय् च्वंगु दक्व घरपालुवा पन्छी नष्ट याना उगु थाय्यात निसंक्रमण यायेधुनागु विभागं जारी याःगु प्रेस विज्ञप्ती न्ह्यथनातःगु दु ।
बर्डफ्लु नियन्त्रणया लागि अनिवार्य रुपं स्वास्थ्य परीक्षण याना भेटेरिनरी प्रमाणपत्र कया जक पन्छी व पन्छीजन्य उत्पादन ओसारपसार यायेत, फार्म जःखः जैविक सुरक्षाया विधित अपनेयाय्गु, फार्मया न्हियान्हिथां निसंक्रमण यायेत इनाप याःगु दु । पन्छी बिरामी जुल धाःसा वा सीत धाःसा पशु सेवाया निकायखय् सूचं बिइत नं विभागं इनाप याःगु दु ।
