ब्राजिलया सुरक्षा प्रमुखपिनिगु छक्वलं राजीनामा
चिल्लागा तृतीया ११४१, चैत्र १८ बुधवाः
ब्राजिलय् स्वंगुलिं सेनाया प्रमुखं छक्वलं राजीनामा ब्यूगु दु । राष्ट्रपति जैर बोल्सोनारों सोमबाः थःगु रक्षा मन्त्रीयात चीकेधुंकाः स्वंगुलिं सुरक्षा निकायका प्रमुखं छक्वलं राजीनामा ब्यूगु खः ।
ब्राजिलया सेना, नेभी व एयर फोर्सया प्रमुखं मंकाः रुपं राजीनामा ब्यूगु खः । न्हूम्ह रक्षामन्त्रीयात नापलानाः उमिसं नापं राजीनामा लःल्हाःगु धाःगु दु । मन्त्रालयं उमिगु थासय् न्हूपिं प्रमुखतय् नियुक्ति याइगु धाःगु दु ।
राष्ट्रपतिलिसे असहमति तयाः इतिहासय् न्हापांगु खुसी स्वंगुलिं सेनाया प्रमुखं राजीनामा ब्यूगु अनया सञ्चारमाध्यमतय्सं न्ह्यथंगु दु ।
बोल्सोनारों सेनायात संविधान व कानुनसम्मत मखसें थः तजबिजय् न्ह्याकेत स्वयेधुंकाः रक्षामन्त्री फर्नान्डो एजेभेडो इ साल्भां उकिया विरोध यानादीगु खः ।
कोरोना भाइरस महामारीयात नियन्त्रणय् कायेत प्रभावकारी भूमिका निर्वाह यायेमफूगु धासें तच्वःगु कुंखिना फयाच्वंम्ह राष्ट्रपति बोल्सोनारोयात थुगु घटना धुंकाः हाथ्या अप्वःगु दु ।
ब्राजिलय् आःतक्क कोरोनाभाइरसया संक्रमणं ३ लख १४ द्वः मनूतय् ज्यान वनेधुंकूगु दुसा लिपांगु इलय् अन संक्रमण हाकनं संक्रमण तच्वःगु रुपं न्यनाच्वंगु दु ।
Categorized in अन्तर्राष्ट्रिय
