लिभरपुल थःगु हे ख्यःलय् बुत
पोहेलाथ्व नवमी ११४१, माघ ९ शुक्रवाः
इंग्लीश प्रिमियर लिग फुटबलय् लिभरपुलयात बर्न्लें १–० गोल अन्तरं बुकूगु दु ।
लिभरपुलयात इमिगु हे ख्यः अर्थात एन्फिल्डय् बुकेत बर्न्लेया आस्ले बार्न्सं ८२गूगु मिनेटय् पेनाल्टीमार्फत निर्णायक गोल याःगु खः ।
कासा बूगुनाप लिभरपुलया एन्फिल्डय् ६८गु तकया अपराजित कासाया यात्रा दित । सन् २०१७ या अप्रिलय् क्रिष्टल प्यालेसनाप कासा बूगु खः ।
तर अनलिं लिभरपुलं थःगु ख्यलय् प्रिमियर लिगया कासा मदिक्क त्याकावःगु खः ।
६८गु तक मदिक्क कासा त्याकावःगु लिभरपुल, प्रिमियर लिगया ल्या धलखय् शिर्ष थासय्च्वंगु म्यान्चेस्टर युनाईटेड स्वयां ६गु ल्यां ल्यूनय् लाःगु दु ।
लिगय् १९गु कासापाखें म्यान्चेस्टर युनाइटेडया ४०गु ल्या दु । ज्वलाक्क म्हितूगु कासापाखें ३४गु ल्या दयेकूगु लिभरपुल प्यंगूगु थासय् दु ।
१८गु कासापाखें ३८गु ल्या दयेकूगु म्यान्चेस्टर सिटी निगूगु थासय् दुबलय् स्वंगूगु थासय्च्वंगु लेष्टर सिटीया ३८गु ल्या दु ।
Categorized in कासा
