क्लब विश्वकप फुटबलया उपाधि बायर्न म्यूनिखयात
सिल्लाथ्व पारु ११४१, फागुन माघ ३० शुक्रवाः
फिफा क्लब विश्वकप फुटबलया उपाधि जर्मनीया बायर्न म्यूनिखं त्याकुगु दु ।
कतारया दोहाय् वंगु च चान्हय् जूगु फाईनल कासाय् मेक्सिकोया टिग्रेस फुटबल क्लबयात १–० या गोल अन्तरं बुका बायर्न म्यूनिखं उपाधि त्याकुगु खः ।
बायर्न म्युनिख त्यागुलिइ फ्रेन्च कासामि बेन्जामिन पाभार्डं ५९गूगु मिनेटय् निर्णायक गोल याःगु खः। बायर्नं लिपांगु ९ला दुने त्याकुगु थ्व ६गूगु उपाधि खः ।
थ्वयान्ह्यः उमिसं युएफा सुपर कप व जर्मन सुपर कप त्याकुगु खः । अथेहे थ्वयान्ह्यःया सिजन उमिसं जर्मन बुन्डेस लिगा नापं, जर्मन कप व युरोपियन च्याम्पियन्स लिग त्याकुगु खः ।
फिफा क्लब विश्वकप फुटबल धेंधेंबल्लाय् फिफाय् आवद्ध ६गू महादेश व क्षेत्रीय पुचःया च्याम्पियनपिन्सं ब्वति न्ह्यथनेगु याःगु दु । युरोपियन क्लबं थुगु उपाधि त्याकुगु मदिक्क थ्व ८क्वःखुसिइ खः ।
थगुने इग्लीश क्लब लिभरपुलं थुगु उपाधि त्याकुगु खः ।
Categorized in कासा
