क्युवाया कम्युनिष्ट नेता राउल क्यास्ट्रों पार्टीया नेतापाखें राजीनामा बिल
चौलाथ्व पञ्चमी ११४१, वैशाख ४ शनिबाः
क्युवाया कम्युनिष्ट नेता राउल क्यास्ट्रों क्युबन कम्युनिष्ट पार्टीया नेतां राजीनामा बियादीगु दु ।
क्यास्ट्रोया राजीनामानाप वय्कया छेँजःया ६गु दसकनिसेंया सत्ता नेतृत्व क्वचाःगु दु । ८९दँया क्यास्ट्रों युवा पुस्तायात सत्ता लःल्हायेगु धयादीगु दु । थःम्हं पूरा लगन व साम्राज्यवादी भावना अःखः च्वनाः नेतृत्व यानागु न क्यास्ट्रों धयादीगु दु ।
वय्कया थासय् न्हूगु नेतृत्व ल्ययेत मतदान जुइत्यंगु दु । थुकिया नितिं सहलह न्ह्यानाच्वंगु दु । क्युवाया कम्युनिष्ट नेता राउल क्यास्ट्रों सत्ता त्वतूगुनाप वय्कया दाजु फिडेल क्यास्ट्रोनाप छेँजःया नेतृत्व क्वचाइगु पक्का जूगु दु ।
सन् १९५९ या क्रान्तिलिपा क्युवाय् क्यास्ट्रोया छेँजलं सत्ताया नेतृत्व यानावःगु खः । हवानाय् जूगु पार्टीया सम्मेलनय् नेता राहुल क्यास्ट्रों राजीनामा घोषणा याःसां थःलिपा सुइत नेतृत्व बीगु धइगु विषय स्पष्ट मयाः ।
तर सन् २०१८ सालय् राष्ट्रपति जुयादीम्ह मिगुएल डिआस–कनेल, क्युबन कम्युनिष्ट पार्टीया नेता जुइगु अपेक्षा यानातःगु दु । थ्वनाप सन् १९५९ लिपा न्हापांखुसि क्यास्ट्रो छेँजः क्युवाया नेतृत्वं बहिर्गमन जूगु दु ।
