च्याम्पियन्स लिग फुटबलया सेमिफाईनल लेगय् म्यान्चेष्टर सिटीया जित, पीएसजी २–१ बुत
चौलागा तृतिया ११४१,बैसाख १६ बिहीवाः
च्याम्पियन्स लिग फुटबलया सेमिफाईनलया न्हापांगु लेगय् म्यान्चेष्टर सिटीं पेरिस सेन्ट जर्मेन (पीएसजी) यात बुकुगु दु ।
वंगु चान्हय् जूगु कासाय् प्रिमियर लिग क्लब सिटीं पीएसजीयात २–१गूया गोल अन्तरं बुकुगु खः । घरेलु मैदानय् फ्रान्सेली क्लब पीएसजीं मार्कुन्होसया गोलय् अग्रता काःगु खः ।
निगूगु हाफय् डी बु्रईनया गोलं सिटी कासाय् लिहाँवल । ७४गूगु मिनेटय् सिटीया रियाद महरेजं गोल याना टिमया जित सुनिश्चित याःगु खः । कासाया ७७गूगु मिनेटय् पीएसजीया गना गयुये ह्याउँगु कार्ड नया मैदानं पिहाँवनेधुंका घरेलु टिम दबावय् लाःगु खः ।
न्हापांगु लेगया जित नापं सिटी सेमिफाईनलय् बल्लागु दु । थ्व जितं सिटीया फाईनल प्रवेशया संभावना बल्लाकुगु दु । घरेलु मैदानय् न्हापांगु लेगय् हे बुइधुंका पीएसजीयात निगूगु लेगय् थप दबाब अप्वइगु खनेदु ।
