चाँगु नारायण द्यःया कलश यात्रा विहिबाः क्वचाःगु दु । दँयदसं पौष शुक्ल पुन्हिया दिनस ख्वपया चाँगुं चाँगुनारायण द्यःयात येँया हनुमानध्वाखा तलेजुइ हयेमाःगु परम्परा कथं विहिबाः कलश येँय् हःगु खः ।

जःखः लक्ष्मी व सरस्वतीया कलश तयाः चाँगुनारायणद्यःया मूल पुजारीं नारायणद्यःया कलश ज्वना वयेगु याइ । थुगुसी चाँगुया पुजारी आभाष धरानन्द राजोपाध्यायं कलश ज्वनावःगु खः ।

थथे कलश ज्वनावइम्ह चाँगुया मूल पुजारीं विशेष कथंया ह्याउँगु तपुलि पुनावयेगु याइगु खः । तर ७२ सालया भुखाचय् चाँगुया पुजारी च्वनीगु छेँ दुनेधुंकाः उगु तपुलि तंगु खःसा उबलेनिसें वकथंया ह्याउँगु तपुलि मपूसे ढाका तपुलि पुइगु याःगु खः ।

थुगुसीनिसें हाकनं व हे कथंया ह्याउँगु तपुलिइ हे पुइगु याःगु दु । ७२ साल धुंकाः थुकथंया तपुलि न्हापांगु खुसी छ्यःगु खःसा आभाषं न्हापांगु खुसीइ हे पूगु खः ।

कलश हनुमानध्वाखा थ्यनीबलय् द्यःयात लितमछ्वयेत धकाः चाया थलबल तछ्यायेगु याइ । चाया थलबल तछ्यातकि अपशकुन जुल धकाः द्यः लिहां बिज्याइमखु धइगु मान्यता कथं थथे याःगु धापू दु ।

कलशयात चाँगुं मूलपानी जुयाः गोकर्ण, जोरपाटी, चाबही, ज्ञानेश्वर, नक्सालं जमः थ्यनेधुंकाः गुरुजु पल्टनलिसें असनं वंघलं हनुमानध्वाखा थ्यंकी । हनुमानध्वाखाय् लायकू कुमारीया न्ह्यःने येँ तलेजुया भुजाहारी राजोपाध्याय ब्राम्हणं विधि कथं पूजा यायेधुंकाः लसकुस यानाः द्यःयात दुकाइ ।

तलेजुइ दुने नं विधि कथं पूजा यानाः हनुमानध्वाखाय् मि च्याकेगु याइ । चाँगुनारायणवासीया कुँ क्यनाः कलश हनुमानध्वाखा थ्यंगु खबर ब्यूगु कथं काइ । थुगु मि च्याकेधुंकाः तांन्वःगु अप्वयावइगु नं जनविश्वास दु ।

तलेजुइ पूजा सिधयेकाः कलशलाई राष्ट्रपति भवन शितल निवास यंकाः राष्ट्रपतियात छायाँ दर्शन याकाःलि कलश हाकनं चाँगुइ हे लितयंकी ।