चीनं उइगुर मुसलमानपिन्त दमनयाना मानवअधिकारया चरम उल्लंघन याःगु अमेरिकी द्वपं
सिल्लागा द्धादशी ११४१, फागुन २६ बुधवाः
चीनं मानवअधिकारया चरम उल्लंघन याःगु अमेरिकां द्वपं ब्यूगु दु । चीनय् दुपिं अल्पसंख्यक उइगुर मुसलमान समुदाययात संयुक्त राष्ट्रसंघया मानवअधिकार घोषणापत्र अःखः चरम दमन याःगु धकाः अमेरिकां धागु दु ।
अमेरिकां सार्वजनिक याःगु छगु प्रतिवदेनमार्फत अल्पसंख्यकपिन्त चीनं मानवअधिकार, अन्तर्राष्ट्रिय कानुन व युद्ध अपराध स्वयां उप्वः यातना ब्यूगु द्वपं ब्यूगु दु । चिनियाँ सरकारं उइगुर समुदाययात याःगु ज्यादती थत्थें क्वचायेकेत न धागु दु । थ्वसिवे न्ह्यः बन्दीतय्त यौन दुव्यवहार याःगु अमेरिकां द्वपं ब्यूगु खः । तर चीनं उगु खँयात खण्डन याःगु दु ।
छुं ई न्ह्यः न पत्रकार सम्मेलनय् नवायेगु झ्वलय् परराष्ट्रमन्त्री वाङ यीं शिनजियाङय् नरसंहार जूगु धकाः वःगु बुखँयात खण्डन यानादीगु खः ।
वंगु जनवरीइ न तत्कालिन अमेरिकी राष्ट्रपति डोनाल्ड ट्रम्पया प्रशासनं चीनं अल्पसंख्यक समुदाययात चरम मानवअधिकार उल्लंघन जुइकथं दमन याःगु द्वपं ब्यूगु खः ।
अनलिं जूगु थीथी अनुसन्धानं थःपिनिगु आशंका पुष्टि जूगु प्रतिवेदनय् उल्लेख याःगु दु ।
Categorized in अन्तर्राष्ट्रिय
