दाहाल–नेपाल पुचलं थौं येँय् सिटी जुलुस याइगु
राम डंगोल | पोहेलाथ्व त्रयोदशी ११४१, माघ १३ मंगलवाः
प्रतिनिधिसभा विघटनविरुद्ध स्वक्वःगु चरणया आन्दोलन घोषणा याःगु नेकपाया दाहाल–नेपाल पुचलं थौं येँय् सिटी जुलुस याइगु जूगु दु ।
न्हिनय् ३ताः ईलंनिसें लैनचौरं न्ह्याइगु जुलुस असं, वंगः जुयाः बसन्तपुली थ्यंकाः कोणसभाय् हिली ।
संघर्ष समितिया नेतृत्वय् न्ह्याइगु जुलुसय् दाहाल–नेपाल पुचःया युवा व विद्यार्थी नेतातय्सं सिटी पुयाः प्रतिनिधिसभा विघटनविरुद्ध खबरदारी याकीगु दाहाल–नेपाल पुचः युवा संगठनया कजि रामप्रसाद सापकोटां जानकारी बियादिल । संघर्ष समितिया कथं उगु हे पुचलं कन्हय् अर्थात बुधवाःनिसें २१ गतेतक संविधानसभाया दुजः, संघीय व प्रदेश सांसदपिन्सं येँया फिब्व ख्यलय् धर्ना
बिइ । दाहाल–नेपाल पुचलं घोषणा याःगु स्वक्वःगु चरणया ज्याझ्वः कथं १६ गते जुलुसनाप शहीदपिन्त श्रद्धाञ्जली बीगु, २२ गते येँय् युवातय्सं ¥याली याइगु, २६ गते मशाल जुलुस व २८ गते येँय् विशाल ब्वज्या याइ । प्रतिनिधिसभा विघटनविरुद्ध दाहाल–नेपाल पुचलं पुस १४ गतेनिसें मदिक्क सडक संघर्षया ज्याझ्वः याइगु जूगु दु ।
अथेहे म्हिग केन्द्रीय ज्याकू पेरिसडाँडाय् च्वंगु दाहाल–नेपाल पुचःया मूँज्यां आन्दोलनया थप ज्याझ्वः घोषणा याःगु दु । पार्टीया केन्द्रीय संघर्ष समितिं पत्रकार सम्मेलन यानाः आन्दोलनया थप ज्याझ्वः घोषणा याःगु दु ।
ज्याझ्वः कथं माघ १३ गते सिट्ठी जुलुस, १४ गतेनिसें २१ गतेतक फिब्व ख्यलय् संविधानसभाया दुजः, राष्ट्रियसभाया दुजः व विघटित प्रतिनिधिसभाया सांसद अले प्रदेश सभाया दुजःपिं दुथ्याकाः न्हियान्हिथं धर्नाया ज्याझ्वःत दु ।
थ्व पुचलं माघ १६ गते शहिद दिवसया सन्दर्भय् जुलुसनाप शहीदहरुप्रति श्रद्धाञ्जली प्वंकीगु ज्याझ्वः तःगु दु ।
माघ १५ गते बुटवलय्, १६ गते विराटनगरय् अले १७ गते धनगढीइ बृहत जनसभा याइगु जूगु दु । इपिं सभाय् पार्टीया नायः व वरिष्ठ नेतातय्सं सम्बोधन याइगु ज्याधलः क्वःज्यूगु दु । प्रदेशया राजधानीइ विशिष्ट कथंया ठोस ज्याझ्वःयात निरन्तरता बीगु, समाजया थीथी तह व तप्काया मनूतनाप अन्र्तक्रिया याइगु जूगु दु ।
संघर्ष समितिया कजि नारायणकाजी श्रेष्ठं थःपिन्सं नेतृत्व
यानागु पार्टी हे आधिकारिक जूगु दाबी यानाः आयोगं कानुनसम्मत निर्णय याइ धइगुलिइ थःपिं विश्वस्त जुयाःच्वनागु धयादिल । अथेहे आयोगया पौ स्वया जक माःकथं निर्णय यानाः न्ह्यज्यायेगु धयादिल ।
दाहाल—नेपाल पुचलं निर्वाचन आयोगं लिपांगु ईलय् छुं न पक्षया निर्णय अमान्य घोषणा याःगुलिइ असन्तुष्टि क्यंगु दु ।
Categorized in राजनीति
